Shillong, Jymmang 26
Ka Meghalaya Assembly’s Committee on Government Assurances ha ka sngi Ba-ar ka la leit jurip ïa ki lai tylli ki projek kiba heh ha ka Jylla kata ka Indoor Stadium ha Umsawli, ka Mawkhanu Football Stadium ha East Khasi Hills bad ka Water Sports Centre ha Umtham kaba ha Ri-Bhoi.
Ïa kane ka kynhun la lamkhmat da u shongknor jong ka komiti bad u Bah Renikton Lyngdoh Tongkhar, MLA ka Mawkyrwat Constituency. Ki dkhot kane ka komiti ki kynthup ïa ka Dr M Ampareen Lyngdoh, MLA ka East Shillong, u Dr. Celestine Lyngdoh, MLA ka Umsning bad u Bah Ollan Singh Suiñ, MLA ka Mawsynram.
Hadien ba ki la dep ban jurip ïa ka jingtei ha Mawkhanu, u Bah Tongkhar u la pynpaw ba u dap da ka jingsngewsarong ba ïa ka stadium kaba heh ha ri India la tei ha kane ka Jylla.
“Ngi dei ban ai khublei ïa u Myntri Rangbah u Conrad Sangma halor ka jingshim khia ka jong u ban wanrah ïa kine ki projek kiba heh ha Meghalaya,” la ong u Bah Tongkhar.
Katei ka stadium kaba don ha Mawkhanu kaba ha New Shillong ha kaba yn lah ban ngiam haduh 40,000 ngut ki paidbah nongpeitkai la tei da ka Sorkar Jylla ha ka jinglut kaba T. 732 klur. Kat kum ka jingïamynjur ha ka tender, la buh ban pyndep pura ïa ka ha u snem 2028.
U shongknor katei ka komiti u la pynpaw ka jingsngewhun halor ka rukom pyntrei ïa katei ka projek bad u la pynpaw ïa ka jingkhmih lynti ban pyndep ïa katei ka projek ha ka por kaba biang.
Katei ka kynhun ka leit jurip ruh ïa ka Water Sports Centre ha wah Umtham bad ka tennis court ha Umsawli.
U Bah Tongkhar u la pynpaw ka jingsngewhun halor ki jinglong jingman ha New Shillong, khamtam eh ha kaba ïadei bad ki jingtei. “Ka long kaba phylla ïa nga bad kumjuh ïa kiwei pat ki para dkhot halor ka jingkiew shaphrang ha New Shillong,” la ong u Bah Tongkhar.
Shuh shuh u la pynpaw ka jingkhmih lynti ba baroh kitei ki projek kiba ha New Shillong yn pyndep hapoh ka por khnang ba ki nongshong shnong ki lah ban pyndonkam ïa ki.
Kiwei pat ki heh ophisar kiba la synran lang ïa katei ka kynhun u Block Development Officer ka Mawryngkneng u Sanjay D. Shira, u Chief Engineer (Sports) Bah Manhiam Marbaniang bad ki nongmihkhmat na ka KPC Projects Limited, ryngkat ki kontraktor na ka bynta katei ka stadium.
