Jerusalem, Jymmang:
U Myntri Rangbahduh jong ka Israel, u Benjamin Netanyahu, u la ong ha kine ki sngi ba la dep, ba ma u bad u President jong ka America- u Donald Trump, ki la mynjur ba kano kano ka jingiateh kaba khatduh bad ka Iran hynrei ka dei ban pynkut noh pura ia ka “jingma nuclear” jong ka Islamic republic.
U Netanyahu, u kdew ïa ka jingïakren hapdeng kine ki arngut ki nongïalam, ha ka miet jong ka Sngi Saitjaiñ, ha kaba u Trump, ula ong kham mynshwa, “ka la ïaid bha bha”.
“U President Trump bad nga, ngi la mynjur ba kano kano ka jingïateh ba khatduh bad ka Iran, ka dei ban pynduh lut ïa ka jingma jong u nuclear. Kane ka mut ban pynpra noh ïa ki jaka pynriewspah jong ka Iran bad ban weng noh ïa ki tiar nuclear ba la pynriewspah na ka jaka jong ka,” ong u Netanyahu ha ka kyrwoh.
“Ka polisi jong nga, kum ka jong u President Trump, ka dang sah kumjuh: Ka Iran kan nym ioh ia ki tiar ialeh nuclear”, u la bynrap.
U Netanyahu u la ong ba kine ki arngut ki la iakren ruh halor ka jingiateh kular halor ka jingplie biang ia ka Strait of Hormuz.
“Ka jingïatreilang hapdeng ki ar tylli ki jaitbynriew jong ngi ka la paw ha ka madan thma, bad kam pat ju long kaba khlaiñ bha,” ong u nongïalam ka Israel, da kaba bynrap ba u Trump u la pynskhem biang ïa ka jingkyrshan jong u ïa ka hok jong ka Israel ban ïada ïalade na ki jingbyrngem ha baroh ki liang, “kynthup ha Lebanon”.
