Shillong, Jymmang 26
Ka Rymbai Shkenshynriah SC ka la ïasoh lang bad ka Langsning FC ban jam sha ka semi-final jong ka lympung ïalehkai 5th Meghalaya State League, hadien ba ka la lah ban khur ïa ka jingjop ha ka jingïalehkai kaba khatduh jong ka quarterfinal league stage ha ka sngi Ba-ar ha SSA Stadium, Polo.
Ka Rymbai Shkenshynriah kaba donkam ban jop lane ïakhaid na ka bynta ban pynthikna ban ïoh rung sha ka semi-final, ka la lah ban pynliem da 5-2 kol ïa ka Nangkiew Irat FC.
Ïa kine ki kol la thep ha ka kylla miet lyngba u Ïaishah Bareh (56′), Hesmiki Rymbai (69′, 90’+3), Niponghi Sumer (77′) bad u Harita Suchen (90’+4). Katba ïa ki ar kol jong ka Nangkiew Irat la thep da u Brolington Warlarpih (58′) bad Justerwell Tham (81′).
Ha shwa jong kane ka jingïakhun, ka Langsning FC ka la lah ban pynskhem ïalade na ka bynta ban wan ha ka kyrdan ba nyngkong na ka Group-B hadien ba ka la lah ban pynliem ïa ka Maram FC da 2-0 kol. Ïa kine la thep da u Donlad Diengdoh (41′) bad u Nelson Rymbai (48′), ha baroh ki ar kylla jong ka jingïakhun.
Ka Langsning FC ka jam sha kane ka kyrdan ïakhun hadien ba ka la lah ba kan khur 5 tylli ki jingjop bad shah rem shisien na ka bynta ban kamai 15 poiñ, katba ka Maram FC kan dei ka nam rem kaba hynriew sien lynter, ïa kaba na kane ka lympung kane ka kynhun kan kit shibun ki jingmyntoi kum shi bynta ka jingpynkhreh ban ïakhun na ka bynta ban rah biang ïa ka nam lahduh ka Tura Super Division, ka ban sa sdang noh shen.
Kumta kaba sah mynta ka long ïa ki jingïakhun ki semi final, ha kaba ka Nongkseh SSCC kan mih madan ban ïakhun pyrshah ïa ka Rymbai Shkenshynriah ha ka 29 tarik bad ban bynrap da ka jingïakhun ka Langsning FC pyrshah ïa ka Shillong Lajong FC ha ka 30 tarik mynta u bnai bad kine ki jingïakhun kin long ha ka por 6 baje janmiet ha SSA Stadium, Polo.
