Shillong, Jymmang 26
Ka Shillong Lajong FC ka dap da ka jingsngew sarong halor ka jinglah ka jong ka ban pynkut ïa ka aïom ïalehkai Indian Football League (IFL) 2025-26 da kaba wan ha ka kyrdan ba-ar bad kane ka la long ka jingai mynsiem ïa baroh ki kynhun ha kylleng jong ka ri.
Kaba kham sngewtynnad ka long ba kane ka kynhun ïalehkai ka nongbah ka la lah ban pynkut ïa kane ka aïom da kaba ka la lah ban pynliem ïa ka lahduh jong kane ka lympung, ka Diamond Harbour da 3-0 kol. Te kumta ka Lajong ka la kamai 28 poiñ na ki 14 sien ïakhun bad ka duna tang shi poiñ ïa ka Diamond Harbour.
Kane ka dei ka sien kaba nyngkong eh ïa ka Shillong Lajong ban jam sha katei ka kyrdan naduh ba la rung sha ka I-League ha u snem 2009.
Kane ka kynhun hapoh ka jingïalam u Virendra Thapa (coach) ka la lah ban khur jingjop phra sien, ïakhaid saw sien bad shah rem tang ar sien.
Watla kane ka klob ka la pynïalehkai tang da ki rangïalehkai kiba na kane ka Jylla bad kumjuh kiba na kylleng jong ka ri kiba hapoh 23 snem rta khlem da wanrah ïa kiba nabar ri, pynban ka la lah ban pynpaw ïa ka jingtbit pyrshah ïa kiwei pat ki klob jong kane ka lympung.
Kane ka klob ka la lah ban kynjoh ïa u mawjam jong ka ha kane ka aïom lyngba ka jingtrei shitom ki rangïalehkai lem bad ki nongïarap jong ka haryngkat ki nongkyrshan kiba ju wan ban ai mynsiem ïa kane ka kynhun ha manla ki jingïakhun bad khamtam eh ha kane ka nongbah.
Watla kane ka klob ka la don kham slem ha kane ka lympung, hynrei ki rangïalehkai ki dei kiba dangkhynnah. Ka la lah ruh ban ïalehkai bha ha ka bynta kaba shadien. Kane ka klob ka la lah ban sei ruh ïa ki rangthep kol ba kynsai bad khamtam eh u Phrangki Buam, uba la ïohpdiang ïa ka nam Most Valuable Player ha kane ka lympung ha kaba u la thep 8 kol, katba u Everbrightson Sana Mylliempdah u la thep 7 kol.
U trai jong kane ka klob u Bah Larsing Ming Sawyan u la ai ka jingïaroh halor ka jingjop jong ka kynhun, da kaba u la pynpaw ba ka jingpyrshang ka pynlong ban kynjoh sha ka thong kaba khlem shym la poi pyrkhat ha kane ka lympung. U la kdew ba ka kynhun ka la pyni ïa ki katto katne ki jingïalehkai phutbol kiba tbit bad kiba itynnad tam ha kane ka lympung, katba u la kam ruh ïa ka bynta kaba kongsan kaba ka la lah ban leh na ka bynta ban pynhun ïa ki nongkyrshan bad ki bor pynïaid.
Ka Shillong Lajong FC ka thmu ban bteng ïa kane ka thong na ka bynta ban kyntiew ïa kane ka kynhun ha ka jingïaid lynti ha kane ka lympung, kynthup ïa ka jingseng ïa ka shlem ai jingai jinghikai ka ban long ka jingpynshlur bad ai mynsien ïa ki khynnah.
“Ka jingthmu ba hakhmat eh jong ngi ka long ban buh ïa ka centre of excellence na ka bynta ka jingïalehkai phutbol. Mynta ka aïom ka la pyni ha ngi ïa kaei kaba ngi lah ban pynurlong,” bynrap biang u Bah Larsing.
Kane ka klob kam lah khlem da ai khublei ïa u Myntri Rangbah ka Jylla u Conrad Sangma halor ka jingïai bteng ban pynshlur bad ban ai mynsiem ïa ka klob, ka jingïohi jngai bad ka jingai jingkyrshan na ka bynta ban kyntiew ïa ka phutbol ha ka Jylla. Ka jingïoh jingkyrshan lyngba ka Sorkar Jylla bad ka CM Football Mission ka la long ka bynta kaba kongsan na ka bynta ban sei ïa ki khynnah kiba don sap ha ki kyrdan ïalehkai kiba kham shajrong.
Shuh shuh ka Shillong Lajong FC ka la pynpaw ka jingai khublei ruh ïa u Myntri ka tnat ïalehkai u Bah Wailadmiki Shylla halor ka jingai jingkyrshan bad ka jingkular ban pynbiang ïa ki jaka ïalehkai bad ban kyntiew ïa ka phutbol ha ka Jylla. Kane ka ai khublei ruh ïa ki nongkyrshan kiba long ki nongïarap ban kyntiew ïa ka klob, kiba kynthup ïa ka Star Cement Ltd, Royal Challenge (Diageo) bad ka Kingfisher (UB Group).
