Washington, Jymmang:
U President ka America, u Donald Trump, ha ka Sngi U Blei ul a ong ba u la dep bthah ïa ki nongpyniasuk ba kin ym kyrkieh ka jingleit pyniakren pynbeit bad ka Iran bad kane ka long ruh ha ka por ba ki nongpyniasuk ki dang pyrshang shitom ban pynkut noh ïa ka jingiakynad hapdeng ka US bad ka Iran bad ban wanrah noh ïa ka shongsuk- shongsaiñ hapoh Middle East.
“Ka jingiakren ka dang iaid ha ka rukom kaba ryntih bad kaba seisoh, bad nga la pyntip sha ki nongmihkhmat jongnga ba kim dei ban kyrkieh ban iakren ne iateh kular ha kane ka por ka don ha ka liang jong ngi”, la thoh u Trump ha ka Truth Social account jong u bad u la ong ruh “Ka jingkhang kan dang treikam haduh ban da poi sha ka jingiateh, pynskhem bad soi.”
Ka America ka la pynjari ïa ka jingkhang ïa ki kad liengsuiñ jong ka Iran naduh ka 13 tarik u Iaiong hadien ba ka Tehran ka la pynsangeh ïa ka leit ka wan lyngba ka wah Hormuz kaba kongsan bha ha ka liang ka ioh ka kot kum ka jingkynthoh ïa ka jinghiar thma jong ka US bad Israel ïa ka Iran kaba la sdang naduh ka 28 tarik u Rymphang.
Kitei ki jingkren jong u Trump ki la wan ha ka por ba ka jingpyrshah jong ki arliang mamla ka la nang kiew ha Washington ha ka shi miet ha kaba katto katne ngut ki nongthaw aiñ bad ki heh sorkar kiba mynta bad kiba mynshuwa ki la kynthoh ïa ki bynta ba la shim ba ka dei ka jingïateh kular kaba la sdang ban paw pyrthei.
“Baroh arliang mamla ki dei ban shim ïa ka por jong ki bad ban ïoh ïa ka hok,” la thoh u Trump ha kajuh ka Truth Social post, katba u dang ther tyngeh ïa ka soskular nuclear jong u snem 2015 kaba u president barim u Barack Obama u la mynjur bad ka Iran.
Katba ka White House kam pat pynpaw ïa ki bynta jong kane ka jingïateh kular, u nongaiktien jong ka tnat kam bar ri jong ka Iran, u Esmaeil Baqaei, u la ong ha ka sngi Saitjaiñ ha ka telebishon jong ka sorkar pdeng ba ki arliang mamla ki la ïajan bad “ka jingïateh kular, ka jait jingïateh kular ba la pynlong da ki 14 tylli ki kyndon,” ha “ka jinglong ban ïajan.”
