Ka khlong maw khlong shyiap ka la sdang naduh ba la wan ka rukom shna ïing shna sem dewbilat bad ka pom dieng pom siej te ka la don naduh ki por ba mynshuwa. Namar mynshuwa ki shna ïing shna sem da ki dieng ki siej, ki phlang ki tynriew ba la ju tip kum ki ïing trep ïing skum. Ha kine ki por ba mynta ngi ïohi ka don ka jingmana jaka ban ym tih maw tih shyiap, tih dewiong tih maw shun bad kiwei kiwei.
Ha ki por mynshuwa te kane ka rukom khlong tih maw tih shyiap bad kiwei kiwei kam da don jingkhang hapoh ka Bri u Hynñiewtrep. Ka don ka jingmana ban pom dieng pom siej bad thang rnga ruh. Hynrei namar ki briew ki im ja bad kamai na kine kiei kiei ki jing-thaw ba u Blei u la ai. Kumta kim lah ban shu sangeh jyndat ïa kane ka rukom ba la ju leh naduh mynshuwa. Namar ngi donkam ban shna ïing shna sem thaiñ kriah thaiñ shang. Namar u Blei ula ai ïa ki maw ki shyiap, ki dewiong bad ki dieng ki siej ban pyndonkam ha ngi ki briew.
Namar baroh kiei kiei kiba la buh u Blei ki long kiba bha. Tangba ngim dei pat ban tih ne pom pathar ïa ki dieng ki siej hynrei ngi dei ban tyngkai na ka bynta ka lawei ki khun ki kti jong ngi hi. Kane ka jingtih maw tih shyiap bad pom dieng pom siej la niew ba ka dei ka jingpynjot ïa ka mariang. Ka Mei mariang ka long shisha ka nongai bam ai dih ïa ngi u khun bynriew. Ngi dei ban pom ïa ki dieng ki siej kiba ngi donkam ym ban pom pynjot lut khoit ïa baroh kumba rep syrti ne rep jhum. Ka tih maw tih shyiap ruh dei ban don ia u pud.
Kumno ban khlong ïa ki, namar ngi donkam ïa u maw u shyiap ban shna ïing shna sem bad bun kiei kiei kiba ngi ki briew ngim lah ban kiar khlem pyndonkam ïa ki mar poh khyndew ruh, kiba u nongbuh nongthaw u la ai ha ngi u khun bynriew. Baroh ki jaitbynriew ha satlak ka pyrthei ki donkam ïa ki maw ki shyiap, ki dieng ki siej bad kiwei kiwei kiba don hapoh khyndew. Kumta haba ngi pom ne tih ngim dei ban pynmong ïa ka Mei mariang.
C. B. Iawphniaw
