Shillong, Jymmang 27
U rangïalehkai ‘dien ka Paris Saint-Germain, u Achraf Hakimi, u long napdeng ki khyndai ngut ki rangïalehkai kiba la don ha ka thup jong ka Morocco, kaba la thaw ïa ka khana ha ka World Cup 2022, u la shah jied na ka bynta kane ka lympung mynta u snem ka ban long ha North America.
U coach ka Morocco, u Mohamed Ouahbi, uba la shah thung dang ha u Lber, u la shim ïa ka kabu na ka bynta ki nongïalehkai jong ka ri ha Europe, ha kaba kiba bun na ki 26 ngut ki rangïalehkai ba u la jied, ki dei kiba la kha shabar ri.
U Ouahbi, uba la kha ha Belgium, katba u Hakimi bad u rangïalehkai shakhmat ka Real Madrid, u Brahim Diaz, ki dei napdeng san ngut ki rangïalehkai, kiba don ha ka kynhun ïalehkai, kiba la kha ha Spain bad lyngba ka jingïadei jong ka longïing longsem, ka pynlong ïa ki ban ïoh ïalehkai na ka bynta ka Morocco.
Lai ngut na ki rangïalehkai jong ka Morocco, u Issa Diop u rangïalehkai ‘dien ka Fulham, u Anass Salah-Eddine u rangïalehkai ‘dien jong ka PSV Eindhoven bad u Ayyoub Bouaddi ba dang 18 snem ka rta – ki la ïoh ïa ka jingmynjur na ka FIFA ha ki khyndai bnai. U Diaz u la ïalehkai na ka bynta ka Morocco naduh u snem 2024 hadien ba u la mihkhmat mynshwa ïa ka Spain.
Ka Morocco ka ban ïalehkai ha New Jersey pyrshah ïa ka Brazil ha ka 13 tarik u Jylliew ha East Rutherford. Nangta kane ka kynhun kan ïakhun pyrshah ïa ka Scotland ha Massachusetts bad pynkut ïa ka jingïalehkai jong ka Group-C pyrshah ïa ka Haiti ha ka 24 tarik, ha Atlanta. Ki ar tylli ki kynhun ki ban wan ha ki kyrdan ba shakhmat kin jam sha ka pre-quarter final ryngkat kawei pat kaba kynsai ka ban wan ha ka kyrdan balai.
Ha ka World Cup 2022, ha ka por ba dangshimti da u Walid Regragui kum u coach, ka Morocco ki la lah ban thaw ïa ka khana na ka bynta ban long kum ka kynhun kaba nyngkong na Africa ban jam shaduh ka semi final.
Ka Morocco kaba la lamkhmat ha ka jingïalehkai group ka la long hakhlieh ïa ka Croatia bad Belgium, hadien ka la pynshaïong ïa ka Spain bad ka Portugal ha ka pre-quarter bad quarter final hashwa ba kan shah rem noh ha ka France.
U rangapkol kane ka kynhun u Yassine Bounou, uba la lah ban ïalehkai bha ha Qatar, un wanphai biang ha ka sien kaba lai ha ka World Cup ha ka rta kaba 35 snem.
Kumba ka paw ka Morocco kan ïalehkai ha ka World Cup 2030 ha kaba kan ïasoh lang ban pynïaid ryngkat ka Spain bad ka Portugal. Kiwei pat ki ri na South America ka Argentina, Paraguay bad ka Uruguay, ki la ïoh ban pynlong ha u 1930.
Ki kyrteng ki rangïalehkai ka Morocco na ka bynta ka World Cup
Goalkeeper: Yassine Bounou (Al-Hilal), Munir El Kajoui (RS Berkane), Ahmed Reda Tagnaouti (AS FAR).
Defender: Noussair Mazraoui (Manchester United), Anass Salah-Eddine (PSV Eindhoven), Youssef Belammari (Al Ahly), Achraf Hakimi (Paris Saint-Germain), Zakaria El Ouahdi (Genk), Nayef Aguerd (Marseille), Chadi Riad (Crystal Palace), Redouane Halhal (Mechelen), Issa Diop (Fulham).
Midfielder: Samir El Mourabet (Strasbourg), Ayyoub Bouaddi (Lille), Neil El Aynaoui (Roma), Sofyan Amrabat (Real Betis), Azzedine Ounahi (Girona), Bilal El Khannouss (Stuttgart), Ismael Saibari (PSV Eindhoven).
Forward: Abdessamad Ezzalzouli (Real Betis), Chemsdine Talbi (Sunderland), Soufiane Rahimi (Al Ain), Ayoub El Kaabi (Olympiakos), Brahim Diaz (Real Madrid), Gessime Yassine (Strasbourg), Ayoube Amaimouni-Echghouyabe (Eintracht Frankfurt).
