Shillong, Jymmang 27
Ka kynhun ki ‘thei ïalehkai ka Mawsadang Sports Club ka la long ka lahduh ha ka lympung ïalehkai Women League ba la pynïaid da ka Tyrsad Area Sports Association (TASA), hadien ba ka la lah ban pynliem noh ïa ka Mawlum Tyrsad da 2-1 kol ha ka sngi Balang.
Ha kane ka jingïakhun final kaba la long ha madan Mawlum Tyrsad baroh ar ki kynhun ki la pyni ïa ka mynsiem ïakhun kaba itynnad bad kaba pynhun ïa ki paidbah nongpeitkai.
Ka Mawsadang ka la ïoh ban pynkhih jar nyngkong eh ha ka minit kaba 4 lyngba ka Bahunlang Synrem.
Kane ka shi kol ka la pynïoh mynta ïa kane ka kynhun bad hashwa ban kut ka jingïalehkai jong ka kylla step ka la ïoh ban thep biang ïa ka kol kaba ar lyngba ka Labianghun Rani (45+2) na ka bynta ban tam da 2-0 kol.
Hapdeng kane ka jingïakhun ki ‘thei ïalehkai ka Mawlum Tyrsad ki la pyrshang ban ïalehkai bha ha ka kylla miet bad dei ha ka minit kaba 79 ba ka la lah ban pynphai kylla lyngba ka penalty ba la shut da ka Balabet Khongsit. Kane ka shi kol ka la nangai mynsiem ïa kane ka kynhun ban ïai bteng ha ka ban ïakhun tyngeh shuh shuh, hynrei haduh kaba kut kam shym la lah shuh ban pynphai bad ka la mad ïa ka jingshah rem.
Ïa ki khusnam sha kine ki kynhun la sam da u Bah Danial Thangkhiew kum u kongsan ha ryngkat u Bah Wellbirth Rani kum u symbud kongsan, ha kaba la ïadon lang ki riew rangbah kiba kynthup ïa u Bah Lamphrang Blah, uba la shah khot kyrpang, nangta u Bah David Khasain, Rang -bah shnong Tyrsad Um-kseh, Bah Diwonsingh Rani, Rangbah shnong Nongmadan, u President/ Secretary HYC, KSU, FKJGP, HNYF Tyrsad Circle, u Dr.Lum Maw -sor, Vice President ka MFA, Bah YG Lyngdoh, dkhot ka MFA, Bah Dipshon Ryntathiang, Convener ka Women Committee jong ka MFA, Bah Pull Nongrum, Vice Presi-dent ka RBSA, Bah Resin Nongsiej, dkhot ka MFA bad u Bah Lambok Nongrang, President ka PDSA nalor kiwei pat.
