Shillong, Jymmang 27
Ka jingpynkhreh jong ka Costa Rica na ka bynta ka jingïalehkai paralok bar ri pyrshah ïa ka England ka la mih ki kynrum kynram hadien ba lai ngut ki rangïalehkai ki la shah weng noh na kane ka kynhun na ka daw ka jingshah kynnoh don kti ïasiat shabar jong kawei ka jaka dih kaba paw.
Kine ki rangïalehkai phutbol ki kynthup ïa u Alejandro Bran, Kenneth Vargas bad u Warren Madrigal ki la shah weng noh na ka kynhun hadien ba ki pulit ki la sdang ïa ka jingtohkit halor ka jingïasiat suloi kaba la jia ha ka por miet ha Los Yoses kaba ha Costa Rica.
La ïathuh ba katei ka jingjia ka la jia ha ka por 1.40 mynstep hadien ba ar kynhun ki la shah ïalam shabar jong katei ka jaka da ki bor pahara. Ki nongsakhi hadien ki la ïohsngew ïa ki jingsawa siat suloi kaba la neh katto katne por, bad ki khubor ki la ïathuh ba ka kali jong u Bran ka la shah siat bun sien.
Na ka liang kitei ki lai ngut ki nongïalehkai phutbol ki la kyntait halor ka jingdon kti ha katei ka jingïasoh ïadat. Ki bor pynïaid jong ka Costa Rica ki la shim rai kyrkieh da kaba weng noh ïa ki nongïalehkai na ka kynhun ïalehkai hashwa ka jingïalehkai paralok ka ban long ha ka 10 tarik u Jylliew pyrshah ïa ka England ha Orlando, Florida.
Na ka liang ka kynhun ïalehkai phutbol jong ka Costa Rica ka la pynpaw ka jingsngewkyndit halor ka jingtohkit ïa ka jingjia ïasiat ha ka por shiteng miet.
Ki bor pulit ki la pynthikna ba la pynlong ka jingtohkit hadien ba kawei ka kali kaba don bynta bad katei ka jingjia ka la shah pynjulor na ka daw ka jingshah ther kuli. Ki bor ba dei khmih ki la ïathuh ba ki ophisar ki la jubab halor ki khubor ba ka la don ka jingsiat suloi shabar jong kawei ka jaka dih Los Yoses ha ka por dangstep phyrngap jong ka lah sngi U Blei.
Hadien kata u Alejandro Bran u la ïoh ïa ka jingkyrshan na ki paidbah lyngba u nongai ktien jong u, uba la ban jur ba une u rangïalehkai shapdeng um shym la donkti ha katei ka kam. La ong ba u Bran u dangshu bam ja miet bad ki paralok ha ka por ba don katei ka jingjia shabar ka jaka dih.
Na ka liang ka synjuk ïalehkai jong ka Costa Rica ka la pynbna nyngkong eh ba ka la weng noh ïa u Bran napoh ka kynhun hashwa ba kan weng sa ïa u Kenneth Vargas bad u Warren Madrigal na ka jingkilanmet.
Kumba ka paw ka Costa Rica kam shym la ïoh rung sha ka FIFA World Cup 2026 hadien ba ka la wan hadien ïa ka Haiti and Honduras ha ka lympung ïaknieh. Katba ka England hapoh ka jingïalam u Thomas Tuchel ka dangdon ha ka jingpynkhreh na ka bynta ka FIFA World Cup 2026.
