Shillong, Jymmang 27
Ka North East Sports Association (NESA) lem bad ka Meghalaya State Olympic Association (MSOA) ki la pynpaw ka jingsngewlem halor ka jingkhlad noh u Secretary General barim ka Indian Olympic Association (IOA) u Raja Randhir Singh.
U Raja u dei uba la ïoh ban ïalehkai hadun san sien ha ka Olympic, u la ïohpdiang ruh ïa ka khusnam Arjuna bad uba la bat teng kum u President ba shipor ka Olympic Council of Asia.
U Singh u dei u nongsiat suloi ba nyngkong eh na ri India ban khur ïa ka takma ksiar ha ka Asian Games ha ka jingïalehkai Trap Shooting bad u la long ruh u dkhot ka International Olympic Committee naduh u snem 2001 haduh u 2014, kumjuh kum u Secretary General jong ka Olympic Council of Asia (1991-2015), bad kum u Secretary General jong ka Indian Olympic Association (1987-2012).
Nalor ki jinglah ban pynurlong ïa ki jingjop, u Raja Randhir Singh u la long u nonghikai, u nongpynïaid bad u nongpynshlur ïa kiwei pat ki nongïalehkai. Ka jingstad, ka jinglong sngewrit bad ka jinglong nongïalam jong u ka la long ka jingai mynsiem ïa ki pateng jong ki nongïalehkai bad ki nongpynïaid ïa ki jingïalehkai.
“Na ka liang ka MSOA, NESA bad na ka liang jong nga shimet, nga pynpaw ïa ka jingsngewlem sha ka longïing ka jong u halor katei ka jingjia kaba sngewsih. To ai ba ka mynsiem ka jong u kan ïoh ïa ka jingshongthait junom,” la pynpaw u Bah John F. Kharshiing, Working President ka MSAO bad uba long ruh u Secretary General ka NESA ha ka kyrwoh kaba u la pyllait ha ka sngi Balang.
