Shillong, Jymmang 28
U Jean-Philippe Mateta u la kylla long u khlur ïalehkai ka Crystal Palace haba kane ka klob jong ka ri England ka la lah ban pynliem noh ïa ka Rayo Vallecano da 1-0 kol ha ka final jong ka Conference League kaba la long ha ka sngi Balang na ka bynta ban rah ïa ka nam lahduh kaba nyngkong jong ka ha Europe.
Kane ka jingjop ka la ai ruh ka jingkhublei ïa u Manager u Oliver Glasner hashwa ba un mih noh na kane ka klob ha kaba kut jong ka aïom ïalehkai.
Kane ka jingïalehkai ka la long kaba ïakhaid bha namar ym shym la don ba lah ban thep kol ha ka kylla step. Ha kaba khatduh ka Palace ka la ïoh ban pynphai jar ha ka minit kaba 51 haba u Adam Wharton u la ïoh ban shut ïa ka bol bad la khanglad noh da u rangapkol, u Augusto Batalla. Pynban u Mateta u la ïoh ïa ka kabu kaba biang bad ka la lah ban pynkhih jar na ka bynta ka Palace.
Kane ka jingjop ka la pynkut ïa ka por kaba sah jingkynmaw na ka bynta ka Palace hapoh ka jingpynïaid jong u Glasner, uba la shimti ïa kane ka kam ha u Rymphang jong u snem 2024. Hadien ba u la dep ban ïalam ïa kane ka klob ban khur ïa ka trophy kaba nyngkong eh ha ka ne ka lympung ïalehkai kaba heh lyngba ka FA Cup ha ka samoi ba la dep, une u coach na Austria mynta un mih noh bad ka nam lahduh ha Europe.
Ki nongkyrshan jong ka Palace ki la rakhe ïa kane ka sngi da ka lama kaba heh kaba ong “Europa League: Boarding” shwa ban sdang ïa ka jingïalehkai, namar ka jingjop ka la pynthikna ruh ïa kane ka klob ban ïoh jaka ha ka Europa League ha ka samoi ka ban wan.
U Glasner u la kam ba mynta u thmu ban bud ïa ka jingïaid lynti jong ka kynhun na la ïing ha u snem ban wan.
Kane ka jingjop ka la pynlong ruh ïa ki klob jong ka ri England ban jop ïa ki jingïalehkai ba paw jong ka Europe ha kane ka samoi hadien ba ka Aston Villa ka la jop ïa ka Europa League bad ka Arsenal ka la poi sha ka phainal jong ka Champions League.
Na ka bynta ka Rayo Vallecano, ka la long ka jingkut kaba pynsngewsih ban kut noh ka jingïaid lynti ha ka phainal ha ka sien kaba nyngkong ha kane ka lympung ha Europe. Katto katne na ki nongkyrshan ki la jaw ummat, hadien ba kane ka kynhun ka la shah rem noh da ka said ha ka Palace.
