Shillong, Jymmang 28
Ka Weilyngkut Area FCC ka la pynliem noh ïa ka Mawlyngngad SC da 4-1 kol na ka bynta ban khur jingjop ha ka lympung ïalehkai U-20 4th Divi-sion Football League 2026 ba la pynïaid da ka Shillong Sports Association (SSA) ha ka sngi Palei.
U Bhabok Kurbah u la thep marwei ar kol, katba ïa kiwei pat la thep da u Dapjingkmen Kurbah bad u Kaliwan Roin na ka bynta ban khur ïa ki lai poiñ.
Ha kane ka jingïakhun kaba la long ha SSA Stadium Polo, baroh ar ki kynhun ki la pyrshang ban ïakhun tyngeh naduh kaba sdang. Hashwa ban kut ka jingïalehkai jong ka kylla step ka Weilyngkut ka la ïoh ban thep ar kol lyngba u Dapjingkmen (40+2) bad u Kaliwan Roin (40+5).
Hadien ba la bteng ïa ka kylla miet katei ka kynhun ka la thep biang ïa ka kol kaba lai lyngba u Bhabok ha ka minit kaba 71 hashwa ba u Nang-ialammane Kharmalki (77) un pynphai shi kol ïa ka Mawlyngngad. Hashwa ban wai u Bhabok (80) u la thep biang ïa ka kol kaba ar ka jong u na ka bynta ban pynlong ïa ka Weilyngkut ban khur syndon ïa ka jingjop.
Ha ka jingïakhun kaba ar, ka Madanrting SC ka la shah rem noh da 1-2 kol ha ka Golflink SC. Kane ka la wan lyngba ki ar kol ba la thep da u Dibian Suting ha ka minit kaba 2 & 14, hynrei ka Madan-rting ka la lah ban pynphai kylla shi kol lyngba u Shanlang Kharkongor (55) hashwa ba kan mad ïa ka jingshah rem.
Haba phai sha kawei pat ka jingïakhun, ka Laitlulong SC ka la pynliem noh ïa ka Lumpyngngad SC da 3-0 kol. Kane ka la wan urlong lyngba ki kol ba la thep da u Luckystar Ryntathiang ha ka minit kaba 13, kumjuh u Bakhrawjingmut Diengdoh (42) bad u Paul Kurbah (55).
Ha ka sngi Thohdieng ka jingïalehkai kan long hapdeng ka Mawshbuit SC pyrshah ïa ka Mawphlang SC ha SSA Stadium, katba ka New Challenger FC ïa ka Pynthorbah SC ha madan MFA. Baroh ar kine ki jingïalehkai kin long ha ka por 1 baje mynsngi.
