Shillong, Jymmang 28
Ka jingpynkhreh jong ka Brazil na ka bynta ka FIFA World Cup 2026 ka la don hapdeng ka jingsngewkhia ha kaba ïadei bad u Neymar hadien ba ki la mih ki khubor kiba la pynthikna ba une u rangïalehkai shakhmat ka Santos u la mad biang ïa ka jingmynsaw kaba jur ha ka khohwah bad u la don hapdeng ka jingartatien na ka bynta katei ka lympung ïalehkai.
Une u rangïalehkai ba la 34 snem ka rta u la poi ha ka prokram kilanmet jong ka Brazil hapoh ka jingpeit bniah jong ki doktor hadien ba u la mad ïa ka jingmynsaw ki dohksah jong ka kjat kamon jong u, ha kaba katei ka jinglong jingman ka la kylla long ka jingkhuslai na ka bynta ka kynhun jong u Carlo Ancelotti hashwa ban sdang katei ka lympung ka ban long lang ha America, Mexico bad Canada.
Katkum ki khubor kiba la mih ha Brazil, la khmih lynti ba u Neymar un duh shim bynta ha ki ar tylli ki jingïalehkai paralok ban pynkhreh ïa ka World Cup pyrshah ïa ka Panama bad ka Egypt bad u lah ruh ban ym lah ban ïalehkai ha ka jingïakhun kaba nyngkong ha ka Group-J pyrshah ïa ka Morocco ka ban long ha ka 13 tarik u Jylliew ha New Jersey.
Na ka liang ka Brazil Football Confederation (CBF) ka la pynthikna ba u Neymar um shym la ïashim bynta ha ki jingkilanmet ha Granja Comary bad u la shah sumar ha kawei ka jaka sumar shimet shimet ha Teresópolis.
Hadien ba la pyndep ïa ka MRI la pynthikna ba u Neymar u la don ha ka ‘grade-two’ jong ka jingmynsaw ha ka khohwah.
U doktor jong ka kynhun ïalehkai ka Brazil, u Rodrigo Lasmar, u la pynpaw hadien ba la eksamin ïa u Neymar, la lap ïa ka jingmynsaw kaba kham jur ban ïa kaba long mynshwa.
“Hynnin ka sngi u Neymar u la leh ïa baroh ki test jong ka koit ka khiah, kaba la pynkut da ka MRI kaba la pynpaw ïa ka jingmynsaw (grade two) ha ka khohwah.”
Te kumta u la khmih lynti ba un ïoh ïa ka jingkoit ha ki ar ne lai taïew,” la ong u Lasmar ha ka kyrwoh ba la pyllait ha Teresópolis.
