New York, Jymmang:
Uwei u nong India uba la leit rung be-aiñ sha US, u la shah kem noh ha ki bor pyniaid ka US hadien ba u la thaw jingkulmar bad tied ïa uwei pat u briew da u dieng tied bol bad kaba la wanrah ïa ka jingkulmar ha Massachusetts.
Ia utei u nong India la ithuh kum u Dhaval Amratbhai Patel, uba la shah kem noh ha ka tnat pulit Worcester na Massachusetts ha ka 16 tarik jong une u bnai Jymmang. Katkum ka jingioh jingtip jong ki pulit, la ong ba u Patel u poi ïa kulmar bad uwei u nongthied kyiad na ka dukan die jingdih kaba utei u nong India u trei bylla, ha kaba, katei ka jingiania hapdeng jongki, ka la wanrah ïa ka jingbitar na baroh arliang bad kaba la pynlong ïa utei u nong India ba un shim da utei u dieng tied bol ba don ha katei ka dukan bad ban tied syndon ïa utei u nongthied.
Watla katta, ka tnat Homeland Security jong ka United States (DHS) ha ka jingthoh ba la pyllait paidbah ha ka Sngi Balang, ka la pyntip ba ki heh sorkar ka Massachusetts kim shym la iatrei-lang bad ka tnat Immigration & Customs Enforcement (ICE) jong ka US bad ba la pyllait noh ruh ïa u Patel na patok khlem da kynjoh ktien shuwa ïa ka ICE.
Kumta, ka ICE ka la kem biang pat ïa u Patel ha ka 18 tarik jong u bnai Jymmang hi ban ioh pyndep ïa ki jingtohkit haba iadei bad ka jingioh rung tuh jong u sha US khlem ki kot- ki sla kiba dei.
Namar la ong ba u Patel u la leit poi phet shnong sha US, khlem ka jingtip jong ki bor pyniaid bad ym shym la tip tikna ruh ha kano ka por bad naduh mynno u la poi leit shong shnong sha US.
