Shillong, Jymmang 29
Ka Meghalaya State Olympic Association hynne ka sngi ka la pdiang sngewbha ïa ka Dr. P.T. Usha, President ka Indian Olympic Association, ha ka jingïawan jong ka sha Shillong ha ka por 2:00 baje nohphai sngi ha ka 29 tarik Jymmang 2026 ha ka Shillong Marriott Hotel.
Kiba la leit ban pdiang sngewbha ïa ka na ka bynta ka MSOA ki kynthup ïa u Bah John F. Kharshiing, Working President ka MSOA bad President ka Shooting Association of Meghalaya; Bah EMH Passah, Senior Vice President ka Meghalaya Athletics Association bad dkhot ka MSOA; ka Kong Matsiewdor War Nongbri, Vice President ka MSOA bad Chief Adviser ka Archery Association of Meghalaya; u Pynbiang Laloo, President ka Meghalaya Badminton Association bad Joint Secretary ka MSOA; bad u Ksan Kupar Warjri, General Secretary ka All Meghalaya Karate Association bad Treasurer ka MSOA.
La donlang ruh ha kane ka jingïalang u Capt. Ajay Narang, Executive Assistant sha ka President ka Indian Olympic Association.
Ki nongïalam ka MSOA ki la pynpaw ïa ka jingsngewnguh ïa ka Dr. P.T. Usha namar ka jingïarap bad jingïalam jong ka ban pynkhlaiñ ïa ka Olympic movement bad ka jingïaid shaphrang jong ka jingïalehkai sports ha Meghalaya bad ka thaiñ Shatei Lam Mihngi. Ha kane ka jingïalang la kren ruh halor ka jingïatreilang ban kyntiew ïa ki nongïalehkai, ban pynbha ïa ki jingïoh jingïarap ha ki jaka jingïalehkai bad ban pynthikna ïa ka jingïaid beit jong ka 39th National Games Meghalaya 2027.
Ka Association ka la pynskhem biang ïa ka jingangnud ban ïatreilang bad ka Indian Olympic Association, ka Sorkar Meghalaya bad baroh kiba don bynta khnang ban pynlong ïa ka Meghalaya kum ka Jylla kaba paw ha ka liang jingïalehkai sports ha ka ri India.
