Jerusalem, Jymmang:
U Benjamin Netanyahu, myntri rangbah duh jong ka Israel, u la ong ha ka Sngi Palei ba u la bthah ia ki shipai jong ka ri ban synshar ia 70% jong ka Gaza Strip, kum ka jingpyrshah ia ki kyndon jong ka jingsangeh thma kaba tlot kaba la treikam ha u bnai Lber.
“Mynta ngi dang pynkhih ia ka Hamas. Mynta ngi synshar ia 60% na ka jaka ha ka strip,” u la ong ha ka jingialang ha kawei ka jaka shong jaka sah jong ka West Bank kaba la shah knieh, katkum ka video ba la pyni da ka tnat treikam Channel 12 jong ka Israel.
U la ong ba ki shipai ki la synshar ia 50 percent jong ka Gaza hapoh ki kyndon jong ka jingsangeh thma, da kaba bynrap: “Ka jingbthah jong nga ka long ban leit sha… 70%”.
“Ngi dang pynkhih ia ki na baroh (liang). Ngin sa iadei bad kaei kaba sah hadien.”
Ka bynta ba nyngkong jong ka jingïasuk ka la ïohi ïa ki nongshah kem ba khatduh eh ha ka jinghiar thma jong ka Hamas ïa ka Israel ha ka 7 tarik u Risaw, 2023, kaba la pynmih ïa ka thma ha Gaza, la pyllait kylliang ïa ki nong Palestine ba la shah kem ha ka Israel.
Ka jingkylla sha ka bynta kaba ar, kaba la dei ban kynthup ia ka jingpynduh tiar ialeh jong ka Hamas bad ka jingweng noh suki suki ia ki shipai Israel, ka la sahkut la bun bnai.
Hapoh ki kyndon jong ka jingsangeh thma, ki shipai Israel ki dei ban kynriah noh shadien jong u ba la khot “u lain rong saw”, ka jingpynbeit pud hapdeng ka jaka kaba hap hapoh ka jingsynshar jong ka Hamas bad kata kaba la bat da ki shipai Israel.
U Netanyahu u la pynbna ha ka 15 tarik u Jymmang ba ki shipai Israel ki la pyniar ia ka jingsynshar jong ki ha Gaza Strip.
“Ki don kiba ong: mih noh, mih noh. Ngim shym la mih noh. Mynta ka sngi ngi synshar… katno? 60%. Lashai ngin sa iohi,” u la ong ha kata ka por.
Ka Gaza ka dang shah teh ha ki jingshah thombor man ka sngi, ha kaba ki shipai Israel bad ka Hamas ki kynnoh iwei ia iwei pat ba ki la pynkhein ia ka jingiateh kular kaba la treikam naduh ka 10 tarik u Risaw.
Ka Israel, ka la pyniap ia palat 900ngut ki briew, naduh ba la sangeh iasiat, ong ka khubor jong ka tnat ka koit ka khiah jong ka Gaza, kaba treikam hapoh ka jingsynshar jong ka Hamas bad ia ki jingkhein jong ka, la shim ba ka long kaba lah ban shaniah da ka United Nations.
Ka Israel, ka la ong ha ka sngi thohdieng, ba ka la pyniap ia u heh ba thymmai jong ka kynhun lehnoh jong ka Hamas ha Gaza, U Mohammed Odeh, hadien ba ka la pyniap ia u nongmihkhmat ba ha shuwa jong u, ha kaba sdang jong une u bnai.
Naduh ka jinghiar thma jong ka Hamas ha u Risaw jong u snem 2023, ka Israel ka la thombor beit ïa ki nongïalam jong ka kynhun, ha Gaza bad ha kylleng ka thaiñ.
U Odeh, u dei u heh ba saw jong ka Ezzedine Al-Qassam Brigades, uba ka Israel, ka ong ba ka la pyniap, naduh ba sdang ka thma ha Gaza.
Ha ka Sngi Balang, u myntri kam pohiing jong ka Israel, u Israel Katz, u la kren biang ia ka thong jong ka Israel ban pynkut noh ia ka jingsynshar jong ka Hamas halor ka jaka jong ka Palestine bad u la kdew ruh ia ka jingthmu ban pynkynriah jubor ia ki nongshong shnong jong ka.
“Ka plan na ka bynta ka jingwan buhai shnong mon sngewbha na Gaza ruh kan sa pyntreikam — baroh yn sa leh ha ka por kaba biang bad ha ka rukom kaba biang,” u la ong.
