Tokyo, Jymmang:
Ha kane ka kynti, la ong ba ka long ka khubor kaba sngew kyndit ban iohi ba ka Japan ka la pynsangeh noh shi syndon ïa ka jingshalan ïa u sohpieng na India hadien ba ki heh jongka, kiba dei peit ïa ka ‘quarantine’ ki la lap ïa ki jingbakla ha ki rukom pynïada ïa ki khñiang jingpang ha ki jaka sumar jong ka ri India ha ka por ba ki leit jurip ha kaba sdang jong une u snem. Kane ka sienjam ka la pynthut ïa ka jingshalan shabar ri ha kane ka aïom lyiur kaba kongsan bha bad ka la ktah ïa ki jait sohpieng ba bha tam jong ka ri India kum u Alphonso, Kesar, Langra bad Banganapalli.
Kane ka long ka sien ba nyngkong eh jong ka jingpyrkhing katei ka ri, ia ki mar bam bad ki mar rep na India, kaba kam pat ju leh mynno- mynno ruh ha kine ki 20 snem ba la dep. Hynrei la ong ba ym tang ha kane ka sien, ka Japan kham mynshwa ka la khang teng ia u sohpieng na India namar ka jingsngewkhia ia ki khñiang jhur. Hynrei ka Japan kala weng biang noh ia katei ka jingkhang ia ka jingshalan sohpieng na India dei ha u snem 2006 hadien ba ka India ka la pynkhlaiñ ia ki rukom sumar bad rukom rep jongka.
Hynrei ha kane ka sien, la ong ba ki bor pyniaid jong ka Japan ki la pynpaw biang sa shisien ïa ka jingsngewkhia hato ki jingshalan sohjew jong ka ri India ki ïahap ne em bad ki kyndon ba pyrkhing bha jong ka ri halor ka koit ka khiah jong ki jingthung.
Ka Japan ka bud ia ka ‘Zero-Policy’ ban ym ailad ia ki khñiang kiba wan rung kum ki khñiang jhur, kiba la shim ba ki long ka jingma kaba khraw ia ka rep ka riang hapoh ka ri.
