Shillong, Jymmang 31
U Myntri ka Sorkar Pdeng ba dei khmih ïa ka tnat ïalehkai, u Dr. Mansukh Mandaviya ha ka step jong ka sngi U Blei u la ïashim bynta ha ka jingïañiah saikil ne ka ‘Sundays on Cycle’ hapoh ka Fit India Movement ha kane ka nongbah.
Ha kane ka prokram la sakhi ïa ka jingïashim bynta shitrhem na ki khynnah samla kiba sngewtynnad ban kilanmet bad ki paidbah, da kaba pynsaphriang ïa ka khubor jong ka jingkoit jingkhiah, ka jingïaineh bad ka rukom im kaba koit ba khiah lyngba ka jingñiah saikil.
Ha kane k sngi la ïashim bynta lang ka Myntri Khynnah ba dei khmih ïa ka tnat ïalehkai ka Raksha Khadse, kumjuh u Myntri ka tnat ïalehkai ka Sorkar Jylla u Bah Wailadmiki Shyll bad kiwei kiwei.
Haba ai jingkren hashwa ban sdang kane ka prokram, u Dr. Mandaviya u la pynpaw ka jingkmen ba ki samla jong ka jylla Meghalaya ki pynsaphriang ïa ka khubor jong ka jingkoit jingkhiah lyngba ka jingñiah saikil. U la ong ba ka jingñiah saikil ka dei kawei na ki rukom kilanmet kaba bha tam bad ka ai jingmyntoi shibun ïa ki paidbah, kynthup ka jingpynduna ïa ka jingjaboh ha ka lyer, ka jingtyngkai ïa ka umphniang bad ka ïarap ban pynduna ïa ka jingkhapngiah ki kali.
U la ong ba ka jingñiah saikil kam dei tang ka kam ba ïadei bad ka jingkoit jingkhiah, hynrei ka dei ruh ka lad kaba biang ban weng ïa ki katto katne ki jingeh ha kane ka juk, kaba pynlong ïa ka kum ka lad kaba bha na ka bynta ka lawei kaba kham khlaiñ kaba kham biang.
Une u Myntri ka Sorkar Pdeng u la ong ba ka ‘Sundays on Cycle’ ka la nangkylla ban pynkhih ha ka ri baroh kawei hapoh ka Fit India Movement, ha kaba da ki lak ngut ki briew ki la ïashim bynta ha kylleng ka ri manla ka sngi U Blei. U la ïathuh ba la pynlong ïa ki jingñiah saikil ha palat 6,000 tylli ki jaka ha kylleng ka ri India mynta ka sngi, kaba pyni ïa ka jingkiew jong kane ka sien jam.
Katba ka jylla Meghalaya ka dangpynkhreh ban pynlong ïa ka National Games ha u snem 2027, u Dr. Mansukh u la kyntu ïa ki nongshong shnong ban pynkhlaiñ ïa ka kolshor ñiah saikil ha ka Jylla.
