Moscow, Jymmang:
Ka Russia ha kane ka kynti, ka la pynbna ba ki stad saïan jongka, ki la lah ban shna ïa u dawai ïada pyrshah ïa une u jait khñiang jingpang ‘Ebola’, uba dang mih thymmai, katei ka jingpynmih, ka long hapdeng ka jingsngewkhia kaba jur jong ki ri ka pyrthei, halor katei ka jingpang Bundibugyo Ebola, kaba dang ïai bteng ha ka Democratic Republic of Congo (DRC) bad ka ri ba marjan jong ka Uganda. U Myntri ka tnat ka koit ka khiah jong ka Russia, u Mikhail Murashko, u ong ba katei ka dawai, ka lah ban ai jingiada, na ka jingpang Bundibugyo kaba duna bha, ha kaba mynta, kam pat don satia ka dawai kaba la pdiang bad pyntikna da ka koit ka khiah, ba yn lah ban tehlakam ïa utei u jait khñiang jingpang ba shyrkhei jong kane ka juk.
Kane ka jingpynbna ka long hadien ka rai jong ka World Health Organization (WHO) ban kheiñ ïa kane ka khlam kum ka Public Health Emergency of International Concern (PHEIC), da kaba kdew ïa ka jingtieng ba kan saphriang sted ha Central Africa. Katkum ka jingkheiñ jong ka WHO, kane ka jingpang ka la dep ban pynlong ïa ki phew ngut kiba la ïoh ïa ka jingpang bad ïap, katba da ki spah ngut kiba la suba ba ki don ïa ka jingpang ki dang don ha ka jingtohkit.
Katba ka jingpynbna ïa u dawai ïada na Russia ka la pynshngaiñ ïa ka pyrthei baroh kawei, ki riew shemphang ha ka koit ka khiah ki maham ba ki jingtip na ki jingpyrshang ha ki jaka sumar jong ki briew, ki kot ba la bishar bniah da ki paralok, bad ka jingbishar bniah jong ki kyndon kin long kiba donkam bha shwa ba ïa une u dawai yn lah ban kheiñ ba u long uba shngaiñ bad uba treikam bha na ka bynta ban pyndonkam ha kylleng ki jaka.
