New Delhi, Jymmang:
Katkum ki khubor, la ong ba ka UAE, ka la pynlong da ki phew tylli ki jinghiar thma liengsuiñ, pyrshah ïa ka Iran. Kien ki jingleit thombor jongka UAE sha ki katto- katne ki bynta jong ka Iran, ki la sdang ha ki sngi ba sdang jong ka thma bad ki la iai bteng haduh ban da sangeh thma ha u bnai Iaiong.
Katkum ki kaiphod ba la ioh lum, la pynpaw ba katei ka jing iadonkti jong ka UAE ha katei ka thma, ka long da ka jingiatreilang bad ka US bad kumjuh ruh bad ka Israel.
Ka UAE ka la shah thombor jur ha ka Iran naduh ba sdang ka thma namar ba ka Iran ka la thombor ïa ki para marjan jong ka Gulf da kaba kynnoh ba ki ïarap ïa ki jingpyrshang jong ka US bad ka Israel. Hynrei ki jinghiar thma jong ka Iran ia ka UAE ki kham jur ban ia kitei kiwei pat ki ri. Ka la siat ia ka Emirates da palat 2,800 tylli ki ‘namding bad ki drone, kaba kham bun shibun ban ia kaba ka la siat sha kiwei pat ki ri, kynthup ia ka Israel.
Ki jinghiar thma jong ka UAE, la ong ba la pynlong da ka jingiatreilang bad ka US bad ka Israel, kiba baroh ar ki la ai jingtip. “Ki la kynthup ïa ki thong ha ki dewlynnong Qeshm bad Abu Musa ha ka duriaw Hormuz; ka Bandar Abbas; ka jaka pynkhuid umphniang ha ka dewlynnong Lavan ha Persian Gulf; bad ka Asaluyeh petrochemical complex, ong ka khubor.
Ka kaiphod ka la ong shuh shuh ba katto- katne na kita ki jingshah thombor “ki la thmu ïa ki jaka pynmih bor ding jong ka Iran kum ka jingkynthoh ïa ki jingshah thombor jong ka Iran ïa ki jaka sam umphniang bad ai lyer jong ka UAE”.
