Shillong, Jylliew 01
Ka Seila Sap F&CC ka la pynjem khnap ïa ka Laitkroh SC da 4-0 kol na ka bynta ban khur jingjop ha ka U-20 4th Division Football League 2026 ba la pynïaid da ka Shillong Sports Association (SSA) ha ka lah sngi U Blei.
Ha kane ka jingïalehkai kaba la long ha madan MFA kaba ha Polo, baroh ar tylli ki kynhun ki la pyrshang ban ïalehkai bha naduh kaba sdang. Dei ha ka kylla miet ba ka Seila Sap kaba la ïoh ban pynkhih jar nyngkong eh lyngba u Freedy Umdor ha ka minit kaba 49. Kane ka kynhun ka la ïoh ban thep biang sa lai kol lyngba u Nangtei Banshembha Kharbangar (52), kumjuh u Sashang Gurung (66) bad u Mebaniohnam Lyngdoh (73) na ka bynta ban khur syndon ïa ka jingjop.
Ha ka jingïalehkai kaba la long ha SSA Stadium, ka Diengpasoh SC ka la pynliem noh ïa ka Summit Academy da 1-0 kol bad ïa kane la thep da u Kornilias Kharkukhi ha ka minit kaba 68.
Haba phai sha kawei pat ka jingïalehkai kaba la long kham hashwa hapdeng ka Mawnianglah Youth SC bad ka Umïew S&CO ki la ïasam mar shi poiñ hadien ba ki la ïathep mar 1-1 kol.
Watla kim shym la lah ban thep kol ha ka kylla step, hynrei ka Umïew ka la ïoh ban pynkhih jar nyngkong eh lyngba u Ronishen Sten ha ka minit kaba 46. Hadien katto katne por ka Mawnianglah Youth ka la lah ban pynphai kylla lyngba u Kenneth Jyrwa (52) na ka bynta ban ïakhaid mar shi kol.
Ha ka sngi Ba-ar ka jingïalehkai kan long hapdeng ka Phir Kurbah MSS&CC pyrshah ïa ka Lumkseh SC ha ka por 1 baje mynsngi bad ha ka por 4 baje nohphai sngi ka Riatsamthiah SC ïa ka Them Rangshken SC. Kine baroh ar ki jingïalehkai kin long ha SSA Stadium, katba ha madan MFA kan long hapdeng ka Ïaitylli S&CC pyrshah ïa ka Pommura SC ha ka por 4 baje nohphai sngi.
