Shillong, Jylliew 01
U rangïalehkai shapdeng ka Sparta Prague u Hugo Sochurek u la shah kynthup hapoh ka kynhun ïalehkai jong ka Czech Republic na ka bynta ka FIFA World Cup, hadien ba u la long u rangïalehkai ba khynnah tam na ka kynhun ha ka jingïalehkai kilanmet pyrshah ïa ka Kosovo.
Ka Czech Republic ka la jop da 2-1 kol bad utei u rangïalehkai ba dang 17 snem ka rta (Sochurek) u la ïoh ban mih madan kum u rangïalehkai shongben ha ka sngi U Blei. Te kumta hadien ba la kut ka jingïalehkai, na ka liang u coach u Miroslav Koubek u la pynduna na ka thup jong ki 29 sha ki 26 ngut.
Te kumta u rangïalehkai shapdeng ka FC Cincinnati u Pavel Bucha, u rangïalehkai shakhmat ka Mladá Boleslav u Christophe Kabongo bad u rangïalehkai shapdeng ka Viktoria Plzen u Tomáš Ladra kim shym la shah kynthup ha kane ka jingpynbna ïa ka thup kaba khatduh.
“Lehse ka dei ka por kaba sniew tam ha ka jingim ka jong nga kum u coach”, la ong u Koubek uba la 74 snem ka rta.
Ka khubor kaba bha na ka bynta ka Czech Republic ka long ba u rangïalehkai shapdeng u Adam Hložek ka Hoffenheim, uba dang shu koit dangshen na ka jingmynsaw kaba la slem bha ha ka khohwah ka jong u, u la wanphai biang sha ka kynhun ban ïalehkai nyngkong eh na ka bynta kane ka kynhun naduh mynta u bnai bad ban ïoh thep kol.
Une u rangïalehkai ba la 23 snem ka rta u la ïoh ban ïalehkai 42 tylli ki jingïalehkai bar ri, ha kaba u la thep 5 kol.
Kane ka kynhun ka la mih ha ka lah sngi U Blei ban leit sha United States na ka bynta ban pynkhreh ïa ka jingïalehkai paralok pyrshah ïa ka Guatemala ha New Jersey ha ka 4 tarik.
Ka kynhun ka la pynskhem ïa ki rangïalehkai kum u rangïalehkai shapdeng ka Lyon u Pavel Šulc, u rangïalehkai shakhmat ka Bayer Leverkusen u Patrik Schick bad u rangïalehkai shapdeng ka West Ham u Tomáš Soucek.
U Koubek u la kynthup ruh ïa ki ar ngut ki rangïalehkai ka Slavia Prague kata u Tomáš Chorý bad u David Doudera, kiba la shah sospon na ka daw ka jingpynkheiñ ïa ki kyndon jong ka klob ha baroh ki ïalehkai jong ka aïom.
Na ka bynta ka World Cup, ka Czech Republic kan ïalehkai ha Mansfield, Texas.
Kane ka kynhun kan pynkhreh ïa ka jingïalehkai kaba nyngkong ha ka Group-A pyrshah ïa ka South Korea ha ka 11 tarik mynta u bnai ha Guadalajara, Mexico. Ha ka 18 tarik kan ïakynduh pyrshah ïa ka South Africa ha Atlanta bad ïa ka Mexico ha Mexico City ha ka 25 tarik.
Kumba ka paw ka Czech Republic ka la ïoh rung sha ka World Cup ha ka sien kaba nyngkong naduh ba la rung teng ha u 2006.
Ki kyrteng ki rangïalehkai ka Czech Republic na ka bynta ka World Cup ki long
Goalkeeper: Lukáš Hornícek (Braga), Matej Kovár (PSV Eindhoven), Jindrich Stanek (Slavia Prague).
Defender: Vladimír Coufal (Hoffenheim), David Doudera (Slavia Prague), Tomáš Holeš (Slavia Prague), Robin Hranác (Hoffenheim), Štepán Chaloupek (Slavia Prague), David Jurásek (Slavia Prague), Ladislav Krejcí (Wolverhampton), Jaroslav Zelený (Sparta Prague), David Zima (Slavia Prague).
Midfielder: Lukáš Cerv (Viktoria Plzen), Vladimír Darida (Hradec Králové), Lukáš Provod (Slavia Prague), Michal Sadílek (Slavia Prague), Hugo Sochurek (Sparta Prague), Alexandr Sojka (Viktoria Plzen), Tomáš Soucek (West Ham), Pavel Šulc (Lyon), Denis Višinský (Viktoria Plzen).
Forward: Tomáš Chorý (Slavia Prague), Adam Hložek (Hoffenheim), Mojmír Chytil (Slavia Prague), Jan Kuchta (Sparta Prague), Patrik Schick (Bayer Leverkusen).
