Turkey, Jylliew:
Kawei ka lieng kaba kit ïa ki riew shangkai pyrthei katba ka dang poi ha ki bynta rud duriaw jong ka Turkey, ka la kylla khongpong noh bad ka la ngam stet tang mar ïa kylla namar ba ka la khia bad kaba la pynlong ïa ki 148 ngut ki nongjngohkai pyrthei, kynthup ïa ki 20 ngut ki khynnah, ban ngam shapoh duriaw, ong ka khubor jong ka New York Post. Katei ka lieng heh “Big Boss Diamond” ka la mih na ka nongbah jngohkai pyrthei jong ka Turkey, ka Marmaris, ha ka Sngi Thohdieng, na ka bynta ban leit sha Paradise Island, kaba shim por kumba 5 kynta ban poi. La pynitynnad ïa ka ban iasyriem bad ka jhad jong ki nonglute lane ki ‘Pirate ship’ kumba ju tip.
Ki nongsakhi ki la iathuh ba ki briew ki la tieng bad ki la mareh sha jrong, ha kaba bun ki la phong ïa ki jaket pynim bad kiwei pat ki la jngi sha ki lieng kiba don hajan. Katkum ki dur ba la saphriang na katei ka jingjia, la iohi ïa uwei u briew uba la kynthih bad jngi shitom ban poi sha kawei pat ka lieng. Kumta ruh la ong ba ki lieng pynlait im kiba don ha katei ka bynta jong ka duriaw, ki la pyrshang shitom ban pyllait im bad ban leit tan ïa kitei ki nongjngohkai pyrthei baroh na katei ka duriaw, ha kaba, ym shym la don kano- kano ka jingma ne jingmynsaw ïa kitei kiba ngam na katei ka lieng ha katei ka jingjia.
Baroh 148 ngut ki briew kiba don ha ka lieng la kheiñ bad la wanrah ïa ki sha ka jaka ba shngaiñ. Ym shym la don kano kano ka khubor ba sngewsih haba iadei bad kane ka jingjia naba baroh hi ki la lait im lut, watla ki don ki nongleit jingleit kiba la shah sumar namar ka jingkyndit bad ki jingmynsaw kiba malu- mala. Ki heh sorkar ki dang tohkit ïa kaei kaba la pynlong ïa katei ka lieng ban ngam jyllop.
Katkum ka jingiathuh jong une u nongpyniaid ïa ka lieng, ka Big Boss Diamond ka dei ka lieng kaba heh tam ha Turkey bad kam pat ju mad mynno- mynno ruh ïa kum kane ka jingjia ha baroh shi katta ki snem bad ki por ba la leit.
