Mawkyrwat, Jylliew 01
U MLA bad MDC ka Ranikor Constituency, u Bah Pius Marweiñ u la plie paidbah ïa ka pung jngi ha Pamdaba, Ranikor Civil Sub Division ïa kaba la ai kyrteng kum ka Kynshi- Rilang Swimming Club ba la pynïaid da ka Kynshi Rilang Cooperative Society, ha ka 30 tarik u Jymmang.
Kane ka projek ka la wan lyngba ka skhim MDC jong u snem 2020-21 ha ka mang pisa kaba T. 7 lak tyngka.
Ha katei kajuh hi ka sngi u Bah Bah Pius u la plie ruh ïa ka Couching Class na ka bynta ban kyntiew ïa ka kam jngi jong ki khynnah bad ki samla ba donsap jong ka thaiñ Ranikor.
Ka jingplie ïa kane ka pung jngi ka la long shisha ka jingkyrkhu ïa ki paidbah ka thaiñ Ranikor khamtam ïa ki samla donsap kane ka thaiñ bad ba kin nanglah ha ka ban pyntbit shuh shuh ïalade ha ka kam jngi bad kiba la ju ïoh ban mihkhmat ïa ka distrik bad khmih lynti ba kin wanrah nam bad burom ym tang hapoh ka distrik, hynrei wat ïa ka Jylla.
