Shillong, Jylliew 02
Ki ‘rang bad ki ‘thei hehksah ka Jylla hapoh ka lama jong ka Meghalaya Strength and Aesthetics Association sa shisien ki la wanrah nam bad burom biang ïa ka Jylla da kaba khur jingjop ha ka rynsan pyni dohksah ba la tip kum ka Mr & Miss Assam Championship kaba la long ha Assam.
Kine ki samla kiba la mihkhmat ïa ka Jylla bad ïoh rah syndon ïa ka nam jop ki kynthup ïa kiba napoh ka East Khasi Hills bad na Garo Hills District.
Ïa kane ka jingïakop la pynlong ha ka sngi Saitjaiñ ha Dudhnoi Janamandir Auditorium, Assam ha kaba ka jingthmu hi ka long ban pynkut ïa ka taïew jong ka jingjied ïa ki ‘rang bad ki ‘thei hehksah ïa kaba la tip kum ka NPC Regionals 2026.
Ki nongjop kiba na East Khasi Hills District ki kynthup ïa u samla Wilynder Khonglam uba la khur ïa ka takma ksiar ha ka kyrdan Heavyweight Category, nangta u Atlanta. D. Shira ruh uba la khur ïa ka takma ksiar ha ka kyrdan Men’s Classic Physique (Tall) bad takma rupa ka Super Heavyweight Category, u samla Bansaman Pyrbot uba la khur ïa ka takma rupa ha ka Lightweight Category, u Bishal Rai uba la ïoh khur ïa ka takma rupa ha ka Junior Men’s Physique, u Arjun Basfor ruh uba la khur ïa ka takma rupa ha ka Men’s Best Physique Category bad ka samla Anita Boro Sawkmie kaba la khur ïa ka nam lahduh (Overall Champion) ha ka Women’s Bikini.
Lyngba kane ka jingïohrah ki samla ka Jylla ïa ki nam lahduh bad takma bapher bapher ha ka jingïakop pyni dohksah ka pyni ruh ïa ka jingtrei shitom jong ki nonghikai (Coach) bad na ka liang ka MSAA ka shim ïa ka bynta ban ai khublei ïa ki bad ruh ïa ki paidbah ka Jylla kiba ju bteng ban ai jingkyrshan na ka por sha ka por ïa ki samla ban poi sha ka thong ka jingjop.
