Washington, Jylliew:
U President ka United States, u Donald Trump, u la pyntikna ba u la lah ban iapynbeit bad ka Iran halor ka jingbuh ïa ki tiar ‘nuclear’ bad u la ong ba ka Iran ka la mynjur ba kan ym buh tiar ‘nuclear’ shuh hadien ba ka US ka la wanrah da ka jingiakut kaba tyngeh bad ka Iran.
Kano kano ka jingpynkylla ïa ka jingtyrwa ka lah ban pynjlan shuh shuh ïa ka jingïateh kular ban pynkut noh da kaba thikna ïa ka thma Middle East bad plie ïa ka lynti ïaid duriaw jong ka Strait of Hormuz hadien ki taiew jong ka jingpyrshang ban pynïoh ïa ka jingïateh kular wat hapdeng ki jingkren beiñ bad ka jingbthei teng teng jong ka jingïakynad.
Ki lad pathai khubor jong ka New York, ki la iathuh ha ka sngi Saitjain, ba u Trump, u la phah biang ïa ka rukom treikam kaba thymmai, kaba dei ban bishar bniah da ka Iran, da ki kyndon kiba “kham tyngeh”, wat la ym pat lah ban tip satia, ïa kaei kaba kata ka kynthup.
U Trump, u ong ba ki jingthmu ba hakhmat eh jong u, na ka bynta kano kano ka jingiateh, ki kynthup ban khanglad ïa ka Iran, na kano kano ka jingpynmih ïa ki tiar ialeh nuclear bad ban plie biang ïa ka Strait of Hormuz, kaba la shah khang khyrdep.
Hynrei ka Tehran mynshwa ka la buh jingartatien ïa ki jingkren jong u Trump bad ki sengbhalang ki la paw ba ki ïapher bha ha ki mat ba kongsan jong ki.
Ka Iran ka la ong ba ka donkam ban pyllait ïa ki marpoh khyndew ba la pynsangeh haduh $12 billion shwa ba kan ïaid sha ka jingïakren kaba jylliew halor ki mat kum ka prokram nuclear jong ka bad ka la khot kham mynshwa ïa ki jingkren jong u Trump ba u uranium ba la pynriewspah jong ka, uba long u nongpynkhreh ïa ki tiar nuclear, un shah pynjot “khlem nongrim”, katkum ki lad pathai khubor jong ka Iran.
Ka Tehran ka la ban jur ruh ba ka Lebanon ka dei ban shah kynthup lang ha kano kano ka jingkut jong ka thma watla ka jingïaleh ka dang ïaid shakhmat, ha kaba ka Beirut ka la kynnoh ba ka Israel ka don ïa ka “policy ba la thang ïa ka khyndew” katba ki shipai jong ka ki nang ïaid shakhmat bad pynlong shuh shuh ïa ki jinghiar thma liengsuiñ kiba ka ong ba ki thmu ïa ka kynhun Hezbollah ba la kyrshan da ka Iran.
Hadien ba u Trump bad ki heh jong ka US ki la ong kham mynshwa ba ki don ha lynti ban iasoi ïa ka jingiateh, u la kren da ka sur kaba kham duna ka jingkyrkieh bad u la ai dak ïa ka jingpynthymmai ïa ka jingleh shipai ha ka jingiakren bad ka Fox.
“Ngam shym la kyrkieh,” u la ong. “Suki suki hynrei ngi nang ioh, nga pyrkhat, ïa kaei kaba ngi kwah bad lada ngim ioh ïa kaei kaba ngi kwah, ngin sa kut noh ha ka rukom kaba pher.”
