Shillong, Jylliew 03
Ka India ka la pynkhreh ban ïakhun pyrshah ïa ka Afghanistan ha ka jingïalehkai Test lem bad ki lai tylli ki jingïalehkai ODI.
Kane ka jingïalehkai da ka bol kaba saw la buh ban sdang ha ka 6 tarik mynta u bnai bad ka jingïalehkai (one day) la buh ban sdang ha ka 13 tarik. Na ka liang ka Board of Control for Cricket in India (BCCI) ka la dep pynbna ïa ki kynhun na ka bynta kine ki jingïalehkai. Ha ka ODI, ki arngut ki nongïalehkai u Hardik Pandya bad u Rohit Sharma la kynthup ha ka kynhun, hynrei ka jingïashim bynta jong ki ha kine ki jingïalehkai kan long katkum ka jingbit jingbiang ha ka jingkoit jingkhiah jong ki.
U Hardik, u la thmu ban poi sha ka BCCI Centre of Excellence (CoE) kaba don ha Bengaluru bad la khmih lynti ba un pynlut por shi taïew ha katei ka jaka, hashwa ba un leit ïasoh bad ki paralok jong u, na ka bynta ka ODI series pyrshah ïa ka Afghanistan. La ong ruh na ka ka liang BCCI ka la bthah ïa baroh arngut u Hardik bad u Rohit ban ai jingtip sha ka CoE, hynrei kam pat don kano kano ka jingpynbna halor ka jingïalehkai na ka bynta ka India.
Ki rangïalehkai ka India na ka bynta ka ODI ki long u Shubman Gill (Captain), Rohit Sharma, Virat Kohli, Shreyas Iyer (vice-captain), KL Rahul (wicket-keeper), Ishan Kishan (wicket-keeper), Hardik Pandya, Nitish Kumar Reddy, Washington Sundar, Kuldeep Yadav, Arshdeep Singh, Prasidh Krishna, Prince Yadav, Gurnoor Brar bad u Harsh Dubey.
U Auqib, Zeeshan ki la long napdeng ki hynñiew ngut ki ban kilanmet ha ka jingkawang bol ha India hashwa katei ka jingïalehkai Test ha Afghanistan.
U Auqib Nabi Dar, uba long u rangïalehkai na Jammu and Kashmir, uba khlem shah jied na ka bynta ka kynhun ïalehkai Test jong ka India, ka la wanrah ïa ka jingshah kynthoh kaba jur, hynrei u la shah khot ha ki bor ba dei khmih jong ka kynhun ryngkat bad ki hynriew ngut kiwei pat ki nongkawang bol hashwa ka jingïalehkai Test pyrshah ïa ka Afghanistan ka ban sdang ha ka 6 tarik mynta u bnai.
Nalor u Auqib, u Zeeshan Ansari uba ïalehkai na ka bynta ka Sunrisers Hyderabad ha ka IPL ruh u la shah khot ban ban kawang bol namar ka Afghanistan ka la khmih lynti ban don katto katne ki nongkawang bol.
“Hooid ïa u Auqib Nabi la bthah ban ïasoh bad ka India Nets. Ym dei tang u Auqib hynrei ki don hynriew ngut kiwei pat, kiba la shah khot ruh ban ïasoh bad ka India Nets. Namar ka jinglong ka suiñbneng, ki arngut ki nongkawang bol u Mohammed Siraj bad u Prasidh Krishna kim lah ban kawang bol bha hashwa ban sdang kitei ki jingïalehkai. Kine ki nongtied kin donkam ban kilanmet bha,” la ong ka tyllong khubor jong ka BCCI.
U Auqib, uba la khur 60 wiket ban long u nongpynhap wiket ba kynsai ha ka por ba u la mihkhmat ïa ka Jammu and Kashmir ban jop ïa ka Ranji Trophy, u la shah pynmih noh da u Gurnoor Brar, uba na Punjab ban mihkhmat ïa ka India.
Kumba ka long mynta ki hynñiew ngut ki rangïalehkai ka Gujarat Titans kynthup ïa u kapten u Shubman Gill, u B Sai Sudharsan, Gurnoor Brar, Prasidh Krishna, Mohammed Siraj, Manav Suthar bad u Washington Sundar ki la don bynta ha ka kynhun ïalehkai Test.
