Shillong, Jylliew 03
Ka jingap khmih lynti ka Aryna Sabalenka ban rah ïa ka nam lahduh kaba nyngkong eh ha ka French Open, ka la poi sha kaba kut hadien ba ka la shah rem noh ha ka ‘thei ïalehkai na Russia ka Diana Shnaider ha ka jingïakhun quarter-final kaba la long ha ka sngi Balang.
Kane ka ‘thei ïalehkai kaba bat ïa ka kyrdan ba nyng -kong ha ka pyrthei ka la sdang ban ïakhun tyngeh hashwa ba kan kut noh ka jingïaid lynti ha kane ka lympung na ka daw ki jingbakla ha ka rukom ïalehkai, ka la shah rem noh da 3-6, 7-5, 6-0 ha ka jingïakhun kaba la long ha Courth Philippe Chatrier. Te kumta ka Shnaider kan ïakynduh pyrshah ïa ka Maja Chwalinska kaba long ka nongïalehkai jong ka Poland ha ka semi-final ha ka sngi Palei.
Ka Sabalenka ka dei tang ma ka kaba long ka lahduh ha ka Grand Slam kaba sah ha ka jingïakhun marwei jong ki shynrang ne ki kynthei, hynrei ka la shah rem ha kane ka jingïakhun na ka daw ka jingbakla haduh 57 sien.
Ka Shnaider, ka la ïoh ban ïalehkai ïa ka quarter final ha ka sien kaba nyngkong eh ha kane ka lympung kaba heh, hynrei mynta ka shem ba ka dei ka nongïalehkai kaba khlaiñ bor na ka bynta ban poi shaduh ka final. Te kumta kan hap ban ïakhun pyrshah ïa ka Chwalinska kaba don ha ka kyrdan ba 114 ha ka pyrthei.
Ka jingshah rem jong ka Sabalenka kaba ym lah ban mutdur ka la pynkynmaw ïa ka rukom ba ka la lah ban pynkhyllem ïa ki nongïalehkai ka liang pyrshah bad wat ha ka Coco Gauff ha ka jingïakhun final.
Kane ka ‘thei ïalehkai kaba na Belarus ka dangïalehkai ïa ka quarter final ha ka Grand Slam ha ka sien kaba 14, hynrei kam shym la lah ban long ka kynthei kaba nyngkong eh ban khur ïa ka jingjop kaba hynñiew sien lynter naduh ba ka Serena Williams ka la lah ban pynurlong.
