Raphael Warjri
Ki buit apktem ki kynthup ïa ka rukom pyntreikam da ka ba swar naba rieh da jingshemphang. Kita ki long ban khmih pyrman ïa ka bynthuiñ ha ka ïaid ka ïeng lyngba kiba lum jingtip da ka nong, kaba swar na ki kor pathai bad kaba pyntreikam sop sop. Kawei pat ka buit apktem ka dei ban pahara ha ki khappud jong ki jylla kum kaba talasi ïa ki briew ba shankhmat, kaba leit thwet kynsan haba ym poi pyrkhat ha ki lad ki lynti ba don jingsuba. Ki iktiar sorkar ki lah ban pyndonkam da ki atiar ka juk mynta ba kynthup ïa ki kali, ki kor ki bor ban swar bad thwet bad pahara ha ki jaka paidbah kum ha ki jaka ïeng kali, ha ki kynja ïew ne kino kino ki jaka ba jyllei ka jinglum ki paidbah. Kawei pat ka buit apktem ka dei ba ki ar jylla ba markhap ki dei ban ïa trei syllok lang da ki pyrton pulit ba khmih ha baroh arliang pud, khnang ba na uwei u pud yn ïarap ïa kiba sha shiliang pud markylliang. Nangta ba ki bor pahara jong ki artylli ki jylla kin ïa sam jingtip halor ki kali ne ki briew kiba don jingsuba ba ki donkti kum ha kino kino ki kam bymman. Kumjuh ruh ban pyrman bad pahara ha ki kyndong lynti ba ha khappud ki artylli ki jylla ba markhap. Kawei na ki ktem kiba lah ban pyntroiñ ïa ki nongleh kam bymman ka dei da kaba tohkit halor ka spah ka phew ba ki don ha ki shlem kynshew pisa kum ki bank bad kiwei kiwei ki lynti ba kheng ha ka khaiï pateng. Tang shu ioh sabut ïa ki kam bymman kynthup ïa kaba khaiï ïa u aphin, la dei ban khang ïa ka rukom pyntreikam jong kita kiba suba sniew, khnang ban pyntlot ïa ka jingïaid jong ka kam bymman. Ki kam bymman ba shyrkhei barabor ki ïaid ryngkat ryngkat bad ka jingpyllut pisa kaba jur na ka bynta ban ïoh ïa kaba ki thmu.Kine ki jingpyrshang ki lah ruh ban dei lyngba ki shlem khaiï kiba riewspah bah.
Lait na kine kiba la kdew, kaba sah ka buit apktem ka dei ha ka aiñ ban pynshi-tom ïa ki bymman ba la ïoh bad ki sabut bad ban daiñ kuna kaba heh ïa ki kynhun ki ba la ioh ban kem. Kumjuh ruh dei ban set byndi ïa kiba la rai pynrem khlem da ai jamin khnang ban long shngaiñ ka imlang sahlang. Nalor kata dei ban swar ïa kiba kum kita wat ynda la poi ka pali ban pyllait noh na byndi. Ka thong ym dei tang ïa kiba pynphriang ban sam ne die paidbah ïa ki aphin sha ki samla, hynrei ban ïai thwet ïa kiba bei tyngka bad ki nongïalam jong ka bynthuiñ ki kam bymman. Sa kawei ka buit apktem kaba kongsan ka dei ka jingïashim bynta jong ki paidbah ha ka imlang sahlang lyngba ki ksanirat (campaign) tipthuh (awareness) ha ki skul, skulbah, bad ha shnong ha thaw kiba shongsyier na ki jingma jong ki kam bymman. Nangta ban pynshlur bad ai jingshngaiñ ïa ki riew shimet kiba kloi ban pyntip ïa ki kam bymman sha ki iktiar shnong bad sorkar, wat hapdeng ba ki khaweit ïa ka kput na ki riew bymman. Kaba kham kongsan ka buit apktem ka long ban pynkhie im biang ïa kito kiba la ngop bad kyrni ha ki kam bymman khamtam ïa kiba brai ha ka dih aphin.
Shuh shuh ka buit apktem kaba donkam ban nang kyntiew ka dei ban kyntiew bui ïa ki kam sniew ba mih lyngba u aphin da ki kor jingtbit jong ka juk mynta. Kaba buh ryntih ïa ki jingtip ha kane ka liang kan ïarap ban thew ban woh ïa ka kiew ka hiar jong ki kam bymman ha ka imlang sahlang.Ha kata ka rukom ki riewtbit ha ki kam ban pynkhiah ïa kiba kyrni bad brai aphin bad ki riewtbit ban pyrkhing ïa kino kino ki kam kiba lah ban long synjor bad lyngkar ha ka imlang sahlang na ka daw jong u aphin, ba kin pyntreikam ïa la ka jingtbit ha kaba yn rat dyngkhong ïa kane ka kam bymman ba la jyrsieh ha ka imlang sahlang.
Kine kiei kiei baroh yn lah ban poi sha ka thong lada manla iwei-pa-iwei na ki paidbah bad ki riewtbit bad ki longsan mansan kiba bat ïa ka iktiar kin synrop lang ha kane ka kam. Lada ki paidbah kin ïeh tang ha ka sorkar ruh ym long namar ba la ju don ka jingshah kynnoh ba ki pulit ki kem ïa ki runar dih aphin ne ïa ki nongkhaiï, hynrei tang shu ioh klop pisa ki la pyllait noh. Nangta lada ki riew shimet ne ka ïing ka sem ki buhrieh ïa ki kam bymman ba marmlien da ki khun ki pyrsa ha ka longïing longsem kan long pynban kumba kyrsoi ïa ka jingsniew ba kan kyan haduh ban da bthei ha kawei ka sien. Kum ha kata ka por ym lah shuh ban kyrda bad sah sniew bad kita kiba leh kam sniew bad ka longïing longsem ruh kumjuh. Tang shu la don ki dak ki shin la dei ban ïa syllok noh bran bran bad ki rangbah ha la ka longïing longsem, nangta ha la ka kur ka jait, bad hadien bad ka iktiar shnong na ka bynta ban lah ban tem shwa ba kan kiew ka kam sniew. Ha kata ka rukom ka jingïatrei lang na baroh ki liang kan wanrah ïa u sohmyntoi ha ka imlang sahlang.Kaba ri burom ïa la ka longïing longsem ym dei ban long ha ka nongrim ban buhrieh ïa kaba sniew kaba thmu ban byrsieh ïa la ka rympei ïing. Kumta kaba leh hok barabor ka wanlam ïa ka hok ka jingshisha ka ba sngur ha la ïing la sem bad ha la ka kur ka jiat bad ha ka imlang sahlang.Kaba ïa syllok noh naduh ba sdang pynidak ki kam sniew kan ïarap ban jynrat syndon naduh dyngkhong.
