Washington, Jylliew:
Katkum ki khubor, la ong ba ka jingiadei hapdeng u President ka US- u Donald Trump bad u Myntri Rangbahduh ka Israel- u Benjamin Netanyahu, ka la sdang ban tlor noh hadien ba la iathuh ba u President jong ka America, u la khot ia utei u Myntri Rangbahduh jong ka Israel, ba u la khie lymwir.
U Trump, ula pynmih ïa ka jingkren beiñ lyngba ka phone ïa u Netanyahu halor ka jingbyrngem jong ka Israel ban bom ïa ka nongbah Beirut jong ka Lebanon, da kaba sheptieng ba kan pynthut ïa ka jingïakren bad ka Tehran.
Ka la pynpaw ïa ka jingïadei kaba nang sniew hapdeng arngut ki paralok ba sha ka liang ka diang kiba don shibun ki jingduhnong ha ka saiñ hima sima na ka thma Middle East bad kiba baroh arngut ki ïakynduh ïa ka jingshah kynthoh namar ba ki ïakynduh ïa uwei pat.
U Trump u kwah ïa ka lad ban mih na ka thma kaba la ktah jur ïa ka ïoh ka kot jong ka US tang hapoh hynriew bnai shwa ka elekshon shiteng samoi, kaban rai lada ka seng Republican jong u kan dang bat ïa ka jingsynshar ha ka Congress.
Une u President Republican ba ar sien, uba la don 79 snem ka rta, u mad ruh ïa ka jingshah kynthoh kaba nang jur na ki bynta jong ka kynhun synrop jong u, kaba long Make America Great Again (MAGA) ba u leh ïa ka jingtyrwa jong ka Israel, ha ka thma Iran.
Katba u myntri rangbah duh jong ka Israel, uba la rim bha, u iakynduh ia ka jingma kaba lah ban jia jong ka kynhun synrop jong ka liang ka diang jong u bad u don hapoh ka jingshah kynthoh, namar ba u dem khrup ha U Trump, ha kaba iadei bad ka jingshngain, hadien ba u la weng noh ia ka jingthmu ban hiar thma ia ka Beirut.
