Tokyo, Jylliew:
Ha kane ka jingjia, la ong ba 4 ngut ki briew, ki la mynsaw hadien ba utei u dngiem u la leh lymwir bad thombor ha ka thaiñ ba shong briew ha Fukushima jong ka ri Japan, ha ka Sngi Ba-ar. Ka Japan ka la sakhi ia 13 tylli ki jingiap briew na kum kine k jingjia shah thombor ha ki dngiem ha u snem ba la dep bad kane ka ju jia man ka por haba ki mrad ki mih ruma na ki khlaw- ki btap ban leit thombor ia ki paidbah na ki shnong ba marjan haba ki lap ka jingthngan ne jingkhie lymwir. “Ka jingjia kaba ïadei bad ka jingmynsaw briew kaba ïadei bad ki dngiem ka la jia ha ka nongbah Fukushima, kaba la pynmynsaw ïa saw ngut ki briew,” ong ki pulit ba dei khmih ha katei ka thaiñ. La iohi nyngkong ia utei u dngiem ha kawei ka karkhana shna tiar kali, ha kaba ki briew na katei ka jaka ki la pyntip sha ka tnat iarap ba kyrkieh hadien ba katto- katne ngut ki nongtrei jong katei ka karkhana ki la shah thombor. La ong ba, katba utei u dngiem u dang bteng ban tur bad thom da ka bor, arngut kiwei pat ki la shah ktah bad mynsaw ha katei ka por, uwei ha ka jaka sah briew bad uwei pat ha ka jaka jong kawei ka karkhana shna tiar lait kaba don hajan, la ong u Yomiuri bad la shu antad ba utei u mrad u la sahkut hapoh katei ka karkhana. Ka khubor ka iathuh ba uwei na kiba shah thombor u la mynsaw jur, hynrei kiwei pat kim shym da mynsaw jur eh. Ha u snem mang tyngka ba la dep tad haduh u bnai Lber, ka jingïohi ïa kine ki mrad dngiem ha kylleng ka ri ka la poi sha ka 50,000 ngut bad la ong ba kane ka la palat kumba arshah ïa ka rekod ba la ioh ban buh ha ki ar snem mynshwa. La ju iohi ruh ia kine ki mrad khlaw ba ki ju leit rung sha ki iing ki sem jong ki briew, ki iaid kai hajan ki skul bad ki iaid kai lyngba ki iew heh bad ki jaka jngohkai pyrthei la jan man ka sngi. Ha u bnai Iaiong, ki jingjia thombor jong ki dngiem ka la wanrah ia ka jingiap jong uwei u briew bad 5 ngut pat ki la mynsaw na kitei ki jingjia, ong ka khubor jong ka tnat peit ba dei khmih ia ka mariang. Ki la don ruh palat shispah tylli ki dngiem ba la lap bad shem ha kylleng ki thaiñ ba shong briew shabar jong ka nongbah Tokyo hapoh jong une u snem, ha kaba la ïathuh ba uwei u nongleit shangkai pyrthei na Russia, uba la don ha ki rta kumba 30 snem eiei, u la shah thombor bad mynsaw ha ka por ba u dang ïaid kjat ha katei ka nongbah ha u bnai ba la dep
