Shillong, Jylliew 04:
Ka Langsning Football Club bad ka Nongkseh SSCC ki la long ba la khreh ban ïakhun ïa ka final ha ka lympung ïalehkai 5th Meghalaya State League 2026 mynta ka sngi Thohdieng ha SSA Stadium ha Polo ha ka por 6 baje janmiet. Haduh kane ka jingïaid lynti kaba san jong ka MSL ym pat shym la don ki kynhun ki ban bat ar sien ïa ka nam lahduh bad kan sei ka sien kaba nyngkong lada ka Nongkseh ne ka Langsning kin khur ïa katei ka nam. Haba pynpaw ha ki lad pathai khubor shi sngi shwa ban sdang katei ka jingïakhun final, u coach ka Nongkseh u Bah Richard Nongneng u la pynpaw ba kum ka kynhun ka la long ba la pynkhreh na ka bynta kane ka jingïakhun final. “Ngi la pynkhreh bha na ka bynta kane ka jingïakhun kaba khatduh. Ngi shaniah ha ki rangïalehkai ba kin ïalehkai bha bad kyrmen ba ngin rah ïa ka jingjop.” “Ka Langsning ka dei ka kynhun kaba khlaiñ ha kaba ka la lah ban ïalehkai bha khamtam eh bad ka Shillong Lajong ha ka semi final. Lyngba katei ka jingïalehkai ka la pynlong ïa ngi ba ngin pynkhreh kham bha shuh shuh ïa ka kynhun. Ngim don jingartatien ba ka kynhun kan ïalehkai bha, namar ngi la jop teng ha ka Champions Cup bad ngi la ïakynduh teng ruh ïa ka Langsning ha u snem ba la lah. Kumta don kano kano ka jingpher watla ngi hap ban ïakynduh ïa ka Langsning bad kyrmen skhem ba ki rangïalehkai kin lah ban ïalehkai bha na ka bynta ban khur ïa ka jingjop,” u la bynrap. Na ka liang u coach ka Langsning u Bah Bah Khlaiñ Pyrkhat Syiemlieh u la pynpaw da kaba ong ba ka kynhun ka la long ba la pynkhreh. “Ka Nongkseh ka long kawei na ki kynhun kaba khlaiñ bha ha kane ka lympung, hynrei ki don katto katne ki jingduna hapoh kane ka kynhun bad ngin hap ban shim kabu ïa kita ki jingduna jong ka.” U kapten ka Nongkseh u Hardy Cliff Nongbri u la pynpaw, “Ngi la ïalehkai bha naduh kaba sdang bad mynta ka kynti ruh ngin hap ban sei bor bah ban ïakhun pyrshah ïa ka Langsning. Hooid ngi la don katto katne ngut ki rangïalehkai kiba la mynsaw kham hashwa, hynrei mynta baroh ki long kiba biang ban ïalehkai.” “Kane ka kynhun ka la long kaba kham biang shuh shuh namar ki bor pynïaid kane ka klob ki la nangpynkhlaiñ shuh shuh da kaba wanrah sa kiwei pat ki rangïalehkai. Te kumta ka kynhun ka la don ïa ki rangïalehai kiba la ju mlien ban ïalehkai ha kane ka lympung. U Hardy u pynpaw ba ka Langsning ruh ka long ka kynhun kaba khlaiñ bor. “Te kumta ngim dei ban kheiñ sting namar ka don ïa ki rangïalehkai kiba la ju mlien ban ïalehkai.” Ha kawei pat ka liang u kapten ka Langsning u Atlanson Kharmaw u la ong, “Ngin la ïalehkai bha naduh kaba sdang bad haduh ka semi final pyrshah ïa ka Lajong. Te kumta ngi kyrmen skhem ba ngin sa lah ban rah ïa ka nam lahduh ha kane ka kynti kaba mynta”
