Jerusalem, Jylliew:
Katkum ki khubor, la ong ba ka Israel ha ka Sngi Palei ka la leit ban thombor biang ïa ki katto- katne ki bynta jong ka nongbah Gaza, ha kaba 11 ngut ki riew paidbah ki la duh ei ïa ka jingim ha katei ka jingleit thombor ba thymmai jong ka Israel ha katei ka sngi.
Napdeng jong kitei kiba khlad, 9 ngut dei kiba iap ha ki bynta Northwest bad Southwest jong ka nongbah Gaza ha ka por ba bthei ki ‘namding jong ka Israel bad 2 ngut pat dei kiba iap ha ka jingleit thombor ki drone ka Israel sha ki bynta Southwest bad phang pdeng jong katei ka nongbah.
Wat hapdeng ka jingïateh kular kaba la treikam naduh u Risaw, ki jingïakynad man ka sngi ki la pynkhih ïa ka Gaza Strip, kaba palat shiteng na ka ka don hapoh ka jingsynshar jong ki shipai Israel ha kaba ïadei bad ki kyndon jong ka jingsangeh thma.
Ka Israel, ka la pyniap ym duna ïa ka 936ngut ki briew, naduh ba la sdang katei ka jingsangeh iasiat, ong ka khubor jong ka tnat ka koit ka khiah jong ka Gaza, kaba treikam hapoh ka jingsynshar jong ka Hamas bad ïa ki jingkhein jong ka, la khein ba ka long kaba lah ban shaniah da ka UN.
Baroh ar tylli ki Hamas bad ka Israel ki kynnoh iwei ïa iwei pat ba ki pynkhein ïa ka jingsangeh iasiat.
Ka bynta ba nyngkong jong ka jingiateh thma ka long ban pyllait ïa ki nongshah rahbor ba khatduh jong ki nong Israel ba la bat da ka Hamas kum ka jingsiew kylliang ïa ki nong Palestine ba la bat da ka Israel.
Ka jingkylla sha ka bynta kaba ar jong ka jingsangeh thma, kaba la dei ban kynthup ïa ka jingpynduh tiar ialeh jong ka Hamas bad ka jingweng noh suki suki ïa ki shipai Israel, ka la sahkut la bun bnai.
Ha ka taiew ba ladep, u Myntri Rangbah duh jong ka Israel, u Benjamin Netanyahu, u la ong ba u la bthah ïa ki bor shipai ban synshar ïa 70% jong ka Gaza Strip.
U khlieh duh ba khatduh eh jong ka tnat lehnoh jong ka Hamas ha Gaza, u Mohammed Odeh, ula shah pyniap ha ka jinghiar thma jong ka Israel, ha ka taiew ba la dep, shibnai hadien ba u nongialam ba ha shuwa jongu ruh, ula shah pyniap.
