Shillong, Jylliew 05
Ka jingïalehkai ba pura bad ka jingïakhun jong ka pateng ban wan ka long kaba la ap khmih lynti bha ha ka jingïalehkai phainal jong ki kynthei ha Roland Garros ha ka sngi Saitjaiñ, hadien ar tylli ki jingïalehkai semi final kiba itynnad ha ka sngi Palei.
Ka Maja Chwalinska, ka nongïalehkai kaba wan ha ka kyrdan 114 ha ka pyrthei, ka la long ka nongïalehkai ba nyngkong eh ha ka juk ïalehkai ‘professional’ ban poi sha ka phainal jong ka French Open. Kan ïakhun pyrshah ïa ka Mirra Andreeva, kaba dang 19 snem ka rta, kaba la rung sha ka final jong ka Grand Slam kaba nyngkong eh jong ka.
Ka Maja Chwalinska ka Poland ka la bteng ïa ka jingïaid lynti kaba ym lah ban ngeit, “kum ka jingphohsniew” da kaba pynliem ïa ka Diana Shnaider kaba wan ha ka kyrdan kaba 25 da 7-6 (7-4), 6-4 ha Court Philippe Chatrier.
Ka Chwalinska ka dei ka nongïalehkai ba nyngkong ha ka Open Era (naduh u snem 1968) ban poi sha ka phainal ha Paris. Lada kan jop ha ka sngi Saitjaiñ, kan ïasoh lang bad ka Emma Raducanu (2021 US Open) kum tang ka nongïalehkai kaba ar ban jop ïa ka nam lahduh jong ka Grand Slam ha ka histori ïalehkai tennis.
Kane ka dei ka jingjop kaba 9 lynter jong ka Chwalinska ha Paris ha ki lai taiew. Shuwa ba kan pynliem ïa ka Shnaider, kane ka nongïalehkai ba 24 snem ka rta ka la pynliem noh ïa kiwei pat ki nongïalehkai ba pawnam, kiba kynthup ïa ka nongjop ha ka Olympic ka Zheng Qinwen, ka Maria Sakkari, bad ka Elise Mertens.
Wat lada kam lah ban jop ha ka phainal, la tharai ba ka Chwalinska kan kiew na ka kyrdan kaba 114 sha ka kyrdan kaba 21 kaba heh tam ha ka pyrthei.
“Ngam tip kaei kaba jia… Nga shu sngewkmen shibun. Ka long kaba eh bha ban ïalehkai pyrshah ïa ki nongïalehkai ba tbit tam ha ka pyrthei na ka sngi sha ka sngi, hynrei ka dei ka Grand Slam kumta phi hap ban ai ïa kaba bha tam jong phi.” La ong ka Maja Chwalinska
Ha kawei pat ka jingïalehkai semi final, ka Mirra Andreeva, kaba dang 19 snem ka rta, ka la pynliem noh ïa ka Marta Kostyuk, da 6-1, 6-3 tang hapoh 76 minit, Ha kaba ka Mirra Andreeva ka la rung sha ka final.
Ka Kostyuk mynshwa ka la jop arsien ïa ka Andreeva ha kane ka samoi ïalehkai, kynthup ïa ka phainal jong ka Madrid Open, hynrei ka Mirra Andreeva na Russia ka la pynleit jingmut bha ha kane ka kynti ban jop ha ka jingïakhun pyrshah ïa ka.
Kane ka jingjop ka dei ka jingjop kaba 35 jong ka Andreeva ha ka jingïalehkai ha u snem 2026, ka jingjop kaba bun tam na kino-kino ki nongïalehkai ha ka jingïalehkai jong ki kynthei mynta u snem.
Ha ka liang ki shynrang pat ha ka jingïakhun semi final u Alexander Zverev, uba dei u nongïalehkai ba 3 ha ka pyrthei bad uba wan ba-ar, u la ïoh rung sha ka phainal, da kaba jop ha ka jingïakhun kaba eh bha, da ki saw set, pyrshah ïa u Jakub Menšík, uba dang 20 snem ka rta, uba pawnam bha ha ka Czech.
Ha kaba kut, ka jingshemphang jong u Zverev ha ki jingïalehkai ba heh bad ka serve kaba skhem ka la pynlong ïa u ban poi sha u lain ba kut ha Court Philippe-Chatrier, da kaba pynskhem ïa ka jingjop da 7-5, 6-2, 3-6, 6-3 tang hapoh lai kynta tam. Kane ka dei ka jingïakhun kaba saw jong u Zverev ha ka Grand Slam katba u dang bteng ïa ka jingïaid lynti jong u ban ïoh ïa ka nam lahduh kaba nyngkong eh kaba eh ban ïoh.
Ïa ka final la ap khmih lynti bha kaban lah ban rai hadien kawei pat ka jingïakhun semi final hapdeng u No. 10 seed Flavio Cobolli bad u world No. 104 Matteo Arnaldi.
Hynrei kane ka jingïalehkai semi final kam shym la poi satia sha ka madan. Tang katto katne minit shuwa ba kin ïakhun, u Matteo Arnaldi u la shah weng noh na kane ka lympung namar ka jingpang/virus kaba kynsan kynsan (la ïathuh ba ka dei ka jingpang ba long bih na kabam kaba la ktah jur bha).
Namar ka jingweng noh kynsan jong u Arnaldi, u Flavio Cobolli u ïoh ïa ka jingïalehkai kaba beit beit sha ka jingïalehkai final ha ka sngi U Blei. Mynta u Alexander Zverev un ïakhun pyrshah ïa u Flavio Cobolli ha ka Sngi U Blei, 7 tarik u Jylliew, ha kaba baroh arngut na kine kin long ka jingjop ba nyngkong jong ki ha ka French Open.
