Washington, Jylliew:
U Secretary of State jong ka US, u Marco Rubio, ha ka Sngi Balang u la kren suk mynsiem da kaba pynksan ba ka thma hapdeng ka US bad ka Iran, ka la kut, wat hapdeng ki jingiakynad kiba dang iai bteng tad haduh kine ki sngi.
Ka thma hapdeng ka US bad ka Israel, kaba ka United States ka la jer kyrteng kum ka ‘Operation Epic Fury’, ka la tap lut ïa ka Middle East baroh kawei naduh ba la hiar thma nyngkong eh ïa ka Iran ha ka 28 tarik u Rymphang.
Ka Iran ka la jubab da kaba thmu ïa ki paralok jong ka US ha kane ka thaiñ bad da kaba khanglad ïa ka Strait of Hormuz, ka lynti shalan umphniang bad ‘gas’ jong ka Gulf.
“Ngi batai ïa ka jingjop kum ka jingpynjot ïa ka jaka karkhana iada jong ki, kaba pynduna shibun ïa ka jingdon jong ki tiar pynher missile kiba ki don, kaba pynduna shibun ïa ka jingbuh jingkynmaw jong ki ïa ki drone,” la ong u Rubio.
“Bad ngi la lah ban pynurlong ïa kita baroh, nalor ba ngi la pynduh ïa kaei kaba ki la iehnoh na ka kynhun shipai suin bad ngi la pynduh pyndam noh ïa ka kynhun shipai duriaw jong ki baroh kawei.”
U Rubio, u la mad ïa ka jingshah pynrem kaba jur na ki heh saiñ pyrthei, kiba la kynthoh ba ka jingïakynad, ka dang ïaid shakhmat, ha kaba ka Iran, ka la hiar thma ïa ka kad liengsuiñ jong ka Kuwait, ha ka sngi thohdieng, ha kaba uwei u briew u la ïap bad 63 ngut ki la mynsaw ha ka jingjur jong ka jingïakynad.
Ka Bahrain, kaba kum ka Kuwait ka don ïa ka jingdon jong ki shipai US kiba pawnam, ka la ïohi ruh ïa ki jingshah thombor ha ka miet jong ki drone na ka Iran.
U Rubio u la pynthymmai ïa ki nongthaw aiñ halor ka jingïakren bad ka Iran, ha kaba u la ong ba ki jingkynshew uranium ba la pynriewspah bha jong ka Islamic republic ki dei ki pdeng jong ki jingïakren bad ba ka Tehran kam pat mynjur satia ïa ka jingïasoi ïasuk.
Ka America ka ban jur ba ka Iran ka dei ban pynphai noh ïa u Uranium ba la pynriewspah bha jong ka, kaba la jan ban long ki tiar ïaleh, ban mynjur ban khanglad ïa ki kam nuclear jong ka bad ban plie biang ïa ka Strait of Hormuz khnang ba kano kano ka jingïateh kular jingsuk kan ïoh bor.
Ka Iran, ka la ong ba ka donkam ban pyllait ïa ki jingdon jingem ba la buh lyngkhot 12 billion dollars ha shwa ban ïakren bniah halor ka prokram nuclear jong ka, bad ka la kyntait ïa ki jingkren ba kham mynshwa jong u president jong ka America, u Donald Trump, uba la ai jingmut ba ha kaba kut, ka jingbuh jingkynmaw jong ka ïa u uranium ba la pynriewspah, kan sa shah pynjot noh.
