Washington, Jylliew:
U President ka America, u Donald Trump, u la kam ba u Myntri Rangbahduh ka India- u Narendra Modi, kum u ‘paralok bajan eh’ jong u, ha kaba, une u President jong ka America u la pynpaw ïa ka jingngeit skhem ba ka Washington bad ka New Delhi kin poi shen sha ka jingïateh kular ha ka liang ka khaïi- pateng. Kane ka jingpyntikna jong u Trump ka long tang hadien katto- katne sngi ba ka sorkar jong u, ka la ong ba ka America ka thmu ban buh khajna sa 12.5% ïa ki mar na India bad 53 tylli kiwei pat ki ri namar ka jingkynnoh ba kam shym la khang ïa ka jingtrei jubor.
Haba jubab ïa ka jingkylli halor ka jingïakren halor ka jingïateh kular khaii pateng, u Trump u la kynnoh ba ka India ka la shim kabu ïa ki polisi jong ka US la bun snem bad ka la shim khajna kaba heh bha, bad ki polisi jong u ki shu pynphai kylla ïa kata.
“Da ki snem, ka India ka la shim kabu ïa ka ri America… Ki la shim khajna kaba heh bha na ngi bad kim shym la siew ei ei… Mynta ka la long kaba pyrshah thikna, bad ngi kamai pisa shibun bad ka India,” u la ong.
