Shillong, Jylliew 07
Hadien hynñiew snem ka India ka la ïoh ban bat biang ïa ka nam lahduh ha ka SAFF Women’s Championship, hadien ba ka la lah ban pynliem noh ïa ka lahduh, ka Bangladesh da 3-1 kol ha ka jingïakhun final kaba la long ha ka sngi Saitjaiñ ha Jawaharlal Nehru Stadium kaba ha Goa.
Kane ka nam jop ka la wan urlong lyngba ka Pyari Xaxa, Sanfida Nongrum bad ka Lynda Kom.
Ha kane ka jingïakhun final baroh ar ki kynhun ki la ïakhun tyngeh naduh kaba sdang. Ka Pyari ka la pynkhih jar nyngkong eh na ka bynta ka India ha ka minit kaba 42 hashwa ba ka Ritu Porna Chakma kan pynïakhaid na ka bynta ka Bangladesh hashwa ban kut ka kylla step. Hynrei ka Sanfida ka la lah ban thep ïa ka kol kaba ar na ka bynta ka India ha ki 40 sekhon hadien ba la bteng ïa ka kylla miet bad hashwa ban wai ka Lynda ka la ïoh ban thep ha ka minit kaba 82 ba ka bynta ban pynlong ïa ka India ban bteng ïa ka jingïoh khur trophy kaba hynriew.
Ka Sanfida, kaba la lah ban ïalehkai ha ki jingïakhun kiba kongsan jong kane ka lympung, ka la ïoh ban thep kol ha baroh ar tylli ki jingïalehkai semi-final bad final. Ka la dem la ki khohsiew ha madan ban kdup ïa ka paralok ka Dangmei Grace, kaba la pynbna ba kan shongthait noh hadien kane ka jingïakhun. Na ka liang ki nongïalehkai bad ki nongtrei kiba don bynta bad kane ka kynhun ki la lehkmen hadien ba ka India ka la wanphai biang sha ka jingjop naduh ba ka la jop nyngkong eh ha u snem 2019. Ka Grace, kaba long ka khlur ïalehkai jong ka ri, ka la mihkhmat ïa ka India haduh 95 sien naduh ba ka la mihkhmat nyngkong ha u snem 2013, bad ka la pynkut ïa ka jingïalehkai bar ri jong ka da ka jingjop lyngba ka jingïoh rah ïa ka nam lahduh kaba lai jong ka ha ka SAFF.
Kane ka jingjop ka la long ka jingsah kynmaw ïa ka India namar ka la jop ïa baroh saw tylli ki jingïalehkai jong ka, da kaba thep 18 kol bad shah pynphai tang shi kol, katba ka la pynkut noh ïa ka jingkhmih lynti Bangladesh ban ïoh ïa ka nam lahduh kaba lai sien lynter.
Kane ka jingïakhun phainal ka don la ki jong ki jingkhmih lynti na baroh ar ki kynhun. Ka Bangladesh ka dei ka kynhun kaba la bat ïa ka nam lahduh ha u snem ba la lah, katba ka India ka don ha ka thong ban knieh noh ïa katei ka nam.
Ka Aveka Singh ka la khur ïa ka nam kum ka nongthep kol ba kynsai da kaba ka la thep 4 kol, ka Sanfida Nongrum ka la ïoh ïa ka nam Most Valuable Player, katba ka Panthoi Chanu Elangbam ka la ïop ïa ka nam Best Goalkeeper. Ka Nepal ka la ïohpdiang ïa ka nam Fair Play.
