Shillong, Jylliew 07
Ka Seng Samla Malki, ha ryngkat ka jingsnohkti lang bad ka Malki Sports Club bad ka Seng Samla Kharmalki, ha ka sngi Saitjaiñ ki la pynkup burom ïa u Bah Thrang-hok Dkhar uba dei uwei na ki rangbah dong ha kane ka shnong uba la khur ïa ka takma rnong ha ka 4th PAFI Arm Wrestling Cham -pionship kaba la long ha Ahmedabad, Gujarat.
Ha katei ka sngi la ïadon lang u Bah Franky Kharumnuid uba dei u President ka Seng Samla Malki, u Bah Rominus Dkhar, General Secretary, Bah Juban Kharmalki, Treasurer, ki nongkikam ka Seng Samla Malki, ki nongkitkam ka Malki Sports Club bad ki nongmihkhmat na ka MAWA.
Na ka liang ki nongkren ki la pynpaw ïa ka jingsngew sarong ba u Bah Thrang uba dei u rangbah dong Kharmalki, u la lah ban wan shakhmat ha ka jingïakhun kti kaba la long ka burom ïa ka shnong bad ïa ka dong.
Na ka liang u Bah Thrang u la ïathuh ba tang shi bnai u la pynkhreh ïalade ha kane ka rynsan, bad khlem duh jingkyrmen, u la lah ban pynliem ïa kiwei pat ki nongïakhun na kiwei ki Jylla bad watla u la liem noh ha ki nongïalehkai kiba la bat nam lahduh ha ka pyrthei, hynrei u don ka jingangnud ba sa shisien un ïoh ban ïakhun biang ha ki rynsan baheh bad ban ïoh pynliem ïa ki.
