Washington, Jylliew:
U President ka US, u Donald Trump, ha ka Sngi Palei u la pynshai ba ka US kam shym la thung pura ïa u Bill Pulte, kum u Director jong ka tnat National Intelligence hynrei katei ka kyrdan ba la pynkhamti ha u, ka long tang shipor ban shimti ïa ki kam kiba la bynshet ha u.
Ka jingpynpaw jong utei u nongialam ka Republican ba u kyntait ban thung ïa u Pulte ha ka kam ba pura, ka long hadien ka jingpynrem jong ki arliang mamla ha Capitol Hill ha kine ki sngi ba ladep halor ka jingbym don jingshemphang jong u Pulte ha ka kam ïada ri. Ka kyrdan ka donkam ïa ka jingpynskhem jong ka Senate, kaei kaei kaba ki nongthaw aiñ ki la pyni ba kam lah ban long lada u Pulte u dei u nongshah jied.
“Un ym long uba neh namar, phi tip, ngam tharai ba un kwah ban long uba neh”, la ong u Trump haba shim jingkylli ha ka ophis Oval hadien ka jingïalang halor u dewiong. U la khot ïa u Pulte kum u “briew uba stad bha” bad u la ong ba u lah ban peit ïa ki elekshon ba la dep kiba u Trump u kam, khlem ki sakhi kiba lah ban ngeit, ba la “leh thok” pyrshah ïa u.
U Trump u la ong ba kiwei pat ki kyrtong ki dang don ha ka jingpyrkhat ban shah pynieng kyrteng ha katei ka kam. “Ngi dang iakynduh ïa ki briew mynta hi,” u la ong.
U Pulte, uba dei u khun ksiew jong u nongseng jong ka PulteGroup, u la long u tynrai jong ka jingïakren hapoh ka bor synshar, namar ka jingtrei jongu kum u director jong ka Federal Housing Finance Agency bad ka jingpeitngor jongu ïa ki kompeni aiwai ïing, ka Fannie Mae bad ka Freddie Mac.
U Pulte u la pyndonkam ïa ka kyrdan jong u ban buddien ïa ki nongïaleh pyrshah jong u Trump ha ka saiñpyrthei halor ka jingkynnoh ba u leh thok ïa ka bai ïing bad u la thombor da ka ktien ïa u Jerome Powell, uba ka samoi treikam jong u kum u chairman jong ka Federal Reserve dang shen ka la kut hadien bun bnai ba u Trump bad u Pulte ki la thombor ïa u namar ba um shym la pynduna ïa ki dor ba la buh da ka bank pdeng. Ka nongpyniaid ïa ka pisa iing jong ka sorkar pdeng ka la buh ruh ïa ka jingsiew bai ïing kaba 50 snem, ka jingmut kaba la pynphai biang namar ka mut ba ka rukom tei ïa ka spah lyngba ka jinglong trai iing kan sa slem.
Baroh arngut ki senator jong ka Republican bad Democratic ki la pynpaw ïa ka jingsngewkhia halor u Pulte bad ka jingbym don ïa ki kot ki sla jong ka jingïada ri ha kaba u bat ïa ka bynta ban pynïaid ïa ki 18 tylli ki tnat sorkar pdeng kiba ïadon bynta ha ki kam ïada hapoh ka ri bad shabar ri. Ka director ba nyngkong eh jong ka tnat wad bniah jong ka ri, ka Tulsi Gabbard, ka Trump, ka la iehnoh kam ha u bnai ba la dep, da kaba ong, ba u tnga jongka, u dang shen, u la ioh ïa ka jingpang cancer.
