Nongstoiñ, Jylliew 09
Hadien shi snem eiei ba la buh ïa u maw nongrim da u Bah Methodius Dkhar, Myntri ka Sorkar Jylla ha kajuh ka por kum u MLA ka thaiñ ha ryngkat u Myntri Rangbah na ka bynta ban tei ïa ka Multipurpose Indoor Hall jong ka Mawthengkut, mynta ka jingtei ïa katei ka projek ka la ïaid shakhmat bad ka la jan dep artad.
Ïa kane ka Multipurpose Indoor Hall (2 Court) la mang ha ka jinglut kaba T.2.78 klur tam eiei ïa kaba la tei ha ka shnong Mawthengkut bad katkum ka jingpeit ka jingpyntrei ka la ïaid shakhmat bad la ïohi ba naduh ki jaka leit bar, ki balcony bad kiwei kiwei ki bynta la dep lut bad la sah ruh satang katto katne ki bynta.
Na ka liang ki riew rangbah jong ka thaiñ kumjuh ruh ki samla, ki la ong ba kumba 90 na ka shispah la dep tei ïa katei ka Hall, bad kum ki samla ki la shu ap khmih lynti hir hir satang lano ban khap ribbon noh, namar shisien peit wat naduh mynta ruh la i kumba ka la long lada pyndonkam noh lada ka shah ka kam ha kano kano ka por kaba i donkam, namar kaba sah mynta ki long satang ban pynïoh sa ki jingshai jong ka bording, ka um bad kiwei kiwei.
Kumban shu pynkynmaw ba dangshen u samla Marshan Hoffman Ïawphñiaw bad u samla Shahkhana Ïawphñiaw ha ka jingïakren bad u nongthoh khubor ki la ong ba katei ka jaka ka dei jong ka seng samla Mawthengkut bad mynshwa ka don tang kumba 5000sq.ft ei ei, hynrei hadien ba u Bah Païa War uba dei u District Sports Officer (DSO) barim ka West Khasi Hills District u la synñiang lem da kaba ai da ka jaka kaba kham heh kat haduh ban da dap biang ïa ka ban shna ïa katei ka Stadium, kumta mynta katei ka jaka ka la don kumba 1 acar.
Ha kaba ïadei bad kane ka Indoor Stadium ha Mawthengkut, na ka liang ki riew rangbah katei ka thaiñ ki la pynpaw ruh ïa ka jingkmen kaba khraw da kaba ki la ong ba ka jingdon jong katei ka Hall kan long ka jingkyrkhu kaba khraw ïa ka thaiñ Mawshynrut hi baroh kawei, la pynpaw u Bah Wanstrong Nongbri uwei na ki riew rangbah jong katei ka shnong.
