New York, Jylliew:
Katkum ki khubor, la ong ba utei u khynnah pule ka US u la jah rngai katba u dang don hapdeng ka jingleit kai shuti na iing, ha ka jingleit jngoh kai jongki sha Japan, ha kaba la ong ba ki bor pyniaid ka Japan ha kane ka por, ki la lap ia ka metiap jong u na Kyoto.
Ia ka met iap jong u James Higginbotham, 20 snem ka rta, la lap na kawei ka jaka lum, da ka kynhun trei mon sngewbha ban wad bad pyllait im, la thoh ka kmie jong u, ka Nancy Higginbotham ha ki social media.
Ia ka daw jong ka jingiap bad ki jingtip ba bniah ym shym la lah ban ioh mardor. “Ka iing jong ngi ka dap da ki jingsngewsih,” ka la thoh. “Ka jingsngewsih kaba ngi sngew kam lah ban batai ha ki kyntien.”
U Higginbotham, uba dei u nongshong shnong jong ka Alabama bad uba dei u samla pule engineering ha Auburn University, la iohi khatduh ia u, ba u mih na kawei ka jaka ieng rel ha Kyoto, ha ka 29tarik Jymmang. Hadien katei ka miet, ka phone jongu, ka la dum bad ki location services jong ka, ki la pynlip noh, ong ka kmie jongu mynshwa, ha ka khubor Reuters.
Haduh katei ka por, ka la lah ban buddien ia ka jingleit jingwan jong u da kaba pyndonkam ia ka app Life360, ka la ong.
Ki kmie ki kpa jong u ki ngeit ba u leit sha ka jaka iaid kjat kaba don hajan. Ka Nancy Higginbotham ka la ïathuh ha ka Reuters ba ka ngeit ba u khun jong ka u lah ban “donkam ïa ka jaka.”
Ka longiing Higginbotham ka dang leit jngoh ia ka ri Japan ban rakhe ia ka jingpynkut skul heh jong u hynmen ba kham rit jong u James Higginbotham.
Ka jingwad nyngkong jong ki bor synshar ka Japan, ka la neh lai sngi bad ka kynthup ia kumba 100ngut ki ophisar pulit, ki kynhun K-9 bad ki liengsuin, hynrei kim shym la lap satia ia ki dak jong u, ong ka CNN.
