Shillong, Jylliew 09
Ka kynhun ki rangïalehkai ka ri India ka la hiar haduh lai kyrdan sha kaba 139 ha ka kyrdan jong ka FIFA, ha ka sngi U Blei hadien ka jinghiar jong ka ha ki lympung ïalehkai bar ri.
Kane ka kynhun ka la shah rem haduh lai sien kynthih, hadien ba ka la shah rem ha ka Unity Cup 2026 hashwa ba kan shah rem da 1-3 kol ha ka jing -ïakhun pyrshah ïa ka Tajikistan ha ka jingïakhun kaba nyngkong na ki ar tylli ki jingïalehkai palaralok bar ri.
Ka kynhun jong u Khalid Jamil ka la kiew san kyrdan sha ka kyrdan kaba 136 ha ka jingpynbna ba kham hashwa da ka FIFA ha ka 1 tarik u Ïaïong, ha kaba ka la khur jingjop kaba 2-1 kol ïa ka Hong Kong, China, ha ka jingïalehkai ba khatduh jong ka lympung ïaknieh jong ka AFC Asian Cup 2027.
Hynrei ka India dangshen ka la shah rem da 0-2 kol ha ka Jamaica, kumjuh da 0-1 kol ha ka Zimbabwe bad da 1-3 kol ha ka Tajikistan, ha kaba ka la pynlong ïa kane ka kynhun ba kan shah pynhiar kyrdan.
Te kumta ka India ka don jingkyrmen ba kan kiew kyrdan bad kane kan shong ha ka jingmih na ka jingïakhun pyrshah ïa ka Tajikistan ha ka jingïalehkai paralok kaba ar ka ban long ha ka 9 tarik mynta u bnai.
