Manila, Jylliew:
Katkum ki khubor, la ong ba ki dang ïa wad ïa kito kiba jah rngai bad kiba ngat ha ki lyngkhot- lyngkhai bad ki kyrum- kymram na ki jingtei ba la julor ha ka thaiñ Shatei Lam Mihngi jong ka Philippines ha ka Sngi Ba-ar ban pyntikna ba ym don shuh kiba dang sahkut hadien katei ka jingkhynñiuh jumai ba jur tam ba katei ka ri ka la sakhi ha ka shiteng spah snem, uba la pyniap ym duna ïa 37 ngut ki briew bad pynpoi sakma ïa palat 32,000 ngut.
La ong ba ki don tang 4 ngut kiba la jah na katei ka jingjia, katkum ki kot ki sla ba la buh jingkheiñ briew da ka sorkar ha ki bynta ba Shatei Lam Mihngi hajan ka thaiñ ba utei u jumai ba 7.8 Magnitude ka jingkhlaiñ u la pynkhynñiuh ha ka step jong ka Sngi Nyngkong, hynrei ka Ophis jong ka Civil Defense ka la kam ba katto katne ki iing kiba la twa bad kiba la shah pynjulor jur ki dei ban shah jurip bha na ka bynta ki briew kiba lah ban im ne kiba la mynsaw.
Utei u jumai, u la ktah jur ïa ka phang pdeng jong ka Mindanao, kaba long ka dewlynnong kaba ar jong ka Philippines, u la ktah bad pyn pynsaw ïa jan 500 ngut ki briew bad pynpoi wir ïa palat 32,000 ngut, ha kaba kiba bun na ki, ki la phet rieh sha ki jaka rieh tngen ba shipor kiba la pynbeit da ka sorkar bad ki bor pyniaid.
Bun ki briew kiba la mih na la ki ïing ki sem ki la tieng ïa ka ‘erlangthari’. La ong ba ka jingkhie ki jingat phyllung ruh ka la poi haduh kumba 1.4-meter (4.6-phut) na ka rukom ba ki jingat phyllung ki ju khie man ka por bad ka don kawei ka sien khie ka jingat phyllung kaba la pyn julor ïa 7 tylli ki ïing rit kiba don ha ki dieng ha kawei ka shnong kaba don harud duriaw.
Kumta la ong ba katei ka jinglynshop utei u jumai bah ha katei ka sngi, ka la iehnoh ïa ka dien jong ka jingpynjot, kynthup ha General Santos, ka nongbah kaba don ha rud duriaw, kaba don palat ïa ka 700,000 ngut ki briew, kaba la tip kum ka nongbah ba kongsan jong katei ka ri, ha kaba ym duna ïa ka 13 ngut ki briew, ki la iap ha ki jingtei kiba la twa.
Kumjuh ruh, ym duna ïa 18 ngut kiba la khlad na ka Jylla Sarangani, kiba kham bun na ka jingtwa khyndew kaba la tep ïa ki iing ha ka shnong Glan kaba don ha rud lum, ong u Rafaelito Alejandro jong ka ophis jong ka Civil Defence.
