Shillong, Jylliew 10
Ka Nongthymmai S&CC bad ka Mawpdang SC ki la jop mar 4-0 kol ïa ki kynhun liang pyrshah ha ka lympung ïalehkai SSA U-20 4th Division Football League 2026 kaba la long ha ka sngi Balang.
Ha kane ka jingïakhun kaba la long ha SSA Stadium kaba ha Polo, ka Nongthymmai ka la pynliem da 4-0 kol ïa ka Mawlyngngad SC. Kane ka nam jop ka la wan urlong lyngba ki kol ba la thep da u Kyrsoisngur Khongjee ha ka minit kaba 9, kumjuh u Shailang Nongkynrih (49), Ronieson Synrem (50) bad kawei pat la ïarap pynthep da u rangïalehkai ka Mawlyngngad u Nangkitbor Pyngrope (80+3) hashwa ban wai.
Ha kawei pat ka jingïalehkai, ka Mawpdang SC ka la pynliem noh ïa ka Thynroit SC da 4-0 kol. Kane ka la wan urlong lyngba ki kol ba la thep da u Marbiang Kharbih ha ka minit kaba 7, kumjuh u Banaijingshai Kharkongor (16), Andrewson Marbaniang (31) bad u Lamshai Jana (76).
Haa phai sha ka jingïakhun kaba la long ha madan MFA, ka Madanrting SC ka la shah rem noh ha ka Weilyngkut Area FCC da 0-2 kol. Kane ka la wan lyngba ka jingïarap pynthep da u rangïalehkai ka Madanrting u Reny Kharkongor ha ka minit kaba 26 bad kawei pat da u Robert Nongsiej (74).
Ha ka sngi Palei ka jingïalehkai kan long hapdeng ka New Challenger FC pyrshah ïa ka Mawshbuit SC ha ka por 1 baje mynsngi, kumjuh ka Nongkseh United FC ïa ka Mawphlang SC ha ka por 4 baje janmiet. Kine ki jingïakhun kin long ha SSA Stadium. Katba kawei pat ka jingïakhun ha ka por 4 baje janmiet kan long hapdeng ka Nongpiur SC ïa ka Pynthorbah SC ha madan MFA.
