Canada, Jylliew:
Ha kane ka khubor, la ong ba uwei u nongñiah liengsuiñ barim jong ka Air Canada, u la shah kynnoh ba u la kit da ki hajar ngut ki nongleit nongwan ha ki liengsuiñ kamai khlem ka laisen kaba biang la 17 snem kynthih mynta.
Ia utei u briew la ithuh kum u Geoffrey Wall, 59 snem ka rta, na Ontario bad la ong ba ha kane ka kynti, u la mad ïa ki katto- katne ki jingshah kynnoh thok, hadien ba la lap ba u ñiah liengsuiñ, da ki kot ki sla kiba shu thok, naduh ba la pynrung ïa u sha ka kam ‘Pilot-in-command’ lane kum u kapten ha u snem 2009, hadien ba u la sdang ïa ka kam ñiah liengsuiñ jong u, ha u snem 1998.
U Wall u la shah kem ha ka 1 tarik u Jylliew, hadien ka jingtohkit kaba bniah halor ka jingleh thok kaba la ai kyrteng ka ‘Project Icarus’. La lap ïa ki jingbym iahap ha ki kot ki sla kiba u la pyni sha ka tnat ‘Transport Canada’ ha ka por ba ju leh ïa ka jingbishar bniah ïa ka jingtreikam kaba man ka sngi ha u snem ba la dep ha ka Kad Liengsuin Pearson, kaba la pynpaw pyrthei syndon ïa katei ka kam thok jong u, kaba u la leh baroh shi katta.
Haduh mynta, la pynngat ïa u ha ka jingdaiñ kuna kaba $5,000, ka jingbuh jingma ïa ka jingim ki paidbah nongleit- nongwan bad la pynngat ruh ïa u hapoh ki 2 tylli ki kyndon pykheiñ aiñ jong ka jingleh thok jong u ïa ki kot- ki sla ba donkam bad nalor kata, la pynngat ruh ïa u, sa ha ki 3 tylli ki kyndon pykheiñ aiñ jong ka jingbuhrieh bad jingpynbam pisa ïa kito kiba iarap ban pynlait ïa u na katei ka kam thok.
Katkum ka jingpynbna jong ka Air Canada, la weng mardor ïa utei u pilot na ka kam mar ïa lap ïa ki kot- ki sla jong u ki dei kiba shu thok ha u snem ba la dep. “Ka kompeni ka la pyntip da ka mon sngewbha ïa kane ka kam sha ka Transport Canada,” la ong katei ka kompeni liengsuiñ.
Na ka bynta ban shah jied kum u kapten, ki nongñiah liengsuiñ ki dei ban don ïa ka AIRLINE TRANSPORT PILOT LICENCE (ATPL), kaba la ïoh shi bynta da kaba pass ïa ki eksamin thoh kiba bun jait. Hynrei ha kine ki 17 snem ba la dep, u Wall u la lah ban pynher ïa ki katto katne jait ki liengsuiñ Boeing bad baroh 900 tylli ki liengsuiñ hapoh ka ri bad shabar ri, katba u dang ïoh tulop da ki million, baroh khlem da don ïa ka laisen kaba biang.
