Africa, Jylliew:
Ha kane ka khubor, la ong ba katei ka nong South Africa, ka Gcina Dhladhla, 29 snem ka rta, ka la kyllon iap hapoh ka kamra sum bad jaka leit bar jong ka jaka trei jongka hadien ba ba ka la kyrpad la bun sien ïa ki nongpyniaid jong ka jaka ba ka trei, ba kin ai shuti ïa ka namar ka jingbym sngewkhlaiñ jongka, hynrei kam shym la ioh shuti satia.
Ka Dhladhla ka trei ha kawei ka ‘Call Centre’ hapoh Cartrack jong ka Rosebank. Ki paralok bad ki bahaiing jongka ki iathuh ba katei ka samla kam ju da kham khlaiñ bad bun sien ka ju khie pang bad tlot, watla katta, la ong ba ki bor pyniaid jong katei ka kompeni kim shym la ai shuti tdot ïa ka.
Nalor kata, la ong ba, ha ka jaka ba kin pynkit mar-mar ïa ka sha ka jaka sumar hadien ba la lap ïa ka na katei ka kamra sum ne ka kamra leit bar jong ka jaka trei jongka, u Manager jongka, u la buh jingkylli pynban ‘hato mano ban hap lut ksan lada leit buh ïa ka sha jaka sumar?’.
La ong ba ha ka Sngi Thohdieng jong ka taïew ba la dep, katei ka samla ka la leit iam kyrpad hakhmat ki bor pyniaid jong katei ka kompeni, ba ka sngew shitom palat bad ba ka donkam ban shong jah thait bad ban pynbiang noh shwa ïa ka met jongka ha iing. Hynrei la ong ba ki nongpyniaid kim shym la pynsngap ïa ka jingkyrpad jongka naba ki pyrkhat ïa ka jingioh nong.
