Shillong, Jylliew 11
Hashwa ban sdang ka lympung ïalehkai World Cup kaba don 48 tylli ki kynhun, u President ka FIFA u Gianni Infantino u la wan shakhmat halor ka jingjia pyrshah ïa u rephri na Somali u Omar Artan.
Ha ka jingshisha u Artan u la pynkhreh ban long u rephri uba nyngkong eh na Somali ban ïoh pynïaid ha ka World Cup. Hynrei u la shah kyntait ban rung sha United States na ka daw ka jingsngewkhia halor ka jingshngaiñ ka jingwan ka jong u sha katei ka ri.
“Ngim lah ban pynïaid lut ïa kiei kiei baroh. Ngi pyrshang. Ngin sa ïakren, bad ngin sa ïa peit. Lehse teng teng ka bha kumjuh ban shu shong pynaram ïalade,” la ong u Infantino.
“Ngeit ïa nga haba nga ïathuh ïa phi, lane wat ngeit ïa nga lada phim kwah, hynrei ngi pyrshang beit ban wad ïa ki lad ki lynti ban pynurlong na ka bynta ki rephri kiba long ki nongpynïaid ïa ka lympung ïalehkai World Cup. Hynrei ngi donkam ban burom ba ngim dei ki syiem jong ka pyrthei.”
U Infantino u la kyntait halor ka jingkiew ha ka liang ka dor jong ki tiket ha kane ka lympung ïalehkai FIFA World Cup 2026, hynrei u la don ka jingthmu ban pynïaid ïew ïa ki million ki tiket.
Kane ka dor jong ki tiket ka la don hapdeng ka jingïakren, khamtam ha ka jingïakhun final, ha kaba ki la don katto katne ki jaka shong kiba la die da ki hajar dollar.
U Infantino u la kynthoh ba ka jingpynhiar dor kan jin da la ai jingmyntoi tang ïa ki nongdie tiket bad ki nongpynïaid ïew kiba die ha ka dor kaba heh.
