Shillong, Jylliew 11
Hadien 28 snem, ka Norway ka la wanphai biang sha ka World Cup ha ryngkat ka jingpynkhreh kaba bniah bad ka bam kaba pahuh pahai.
Kane ka kynhun ka la poi ha America bad ka la wankit la ka jong ka bam ka dih kaba kham pher na la ka jong ka ri, kynthup ïa 300 kilo ka dohkha, 116 kilo ka cheese, bad palat 6,000 tylli ki soh ñiamtra. Ïa kine ki mar bam la pynpoi sha katei ka kynhun, kaba dangkilanmet ha Greensboro, North Carolina.
Ki bor ba dei khmih kane ka kynhuh ki la pynpaw ba ki soh ñiamtra kin don ka bynta kaba kongsan ha ka jingbam ba man ka sngi jong ki nongïalehkai ha kane ka lympung. Ka jingpynneh ïa ka rukom bam kan ïarap ïa ki nongïalehkai ban ïoh ïa ka met ka phad kaba koit ba khiah haba ki don shabar ri.
Uba lamkhmat ïa kane ka kam u dei u Aron Espeland, uba la shakri kum u nongshet jingshet na ka bynta katei ka kynhun ïalehkai jong ka Norway la 35 snem kynthih. U Espeland u ngeit ba ka kynhun kan bam lut ïa ki dohkha kiba khia 300 kilo hashwa ba ka jingïakhun jong ki ha ka World Cup kan kut noh. La ïarap lang ïa u da ki lai ngut ki nongshet jingshet kiba paw na Norway.
Nalor ki jingbam tei met, la wanrah ruh ïa ki jingbam ki ban ïarap ha ka bor pyrkhat pyrdaiñ. Da ka jinglong ka suiñbneng bad ka mariang jong ka North Carolina kaba pher na kaba long ha la ïing, la khmih lynti ba kin long ki jingïarap ïa ka kynhun ba kan ïalehkai bha ha kane ka lympung.
Ha kane ka lympung, ka Norway ka la don ha ka Group-I, ha kaba kan ïakhun pyrshah ïa ka France, Senegal, bad Iraq. Kiba bun ki la pynpaw ba kane ka group ka long kaba kham eh ha kane ka lympung.
Te kumta ka Norway kan pynkhreh ban ïakhun nyngkong pyrshah ïa ka Iraq ha ka 17 tarik mynta u bnai, kumjuh ïa ka Senegal ha ka 23 tarik bad ïa ka France ha ka 27 tarik.
