Shillong, Jylliew 11
Ka Mawshbuit SC, Nongkseh United FC bad ka Nongpiur SC ki la khur jingjop ha ka lympung ïalehkai U-20 4th Division Football League 2026 ba la pynïaid da ka Shillong Sports Association (SSA) ha ka sngi Palei.
Ha kane ka jingïakhun kaba la long ha SSA Stadium kaba ha Polo, ka Mawshbuit SC ka la pynliem noh ïa ka New Challenger FC da 3-1 kol. U Romario Mawrie u la thep ar kol ha ka minit kaba 14 & 62 bad ïa kawei pat la thep da u Aibanjop Sun (40). Na ka liang ka New Challenger ka la pynphai kylla shi kol lyngba u Dame hajong Mawlieh (26) hashwa ba kan mad ïa ka jingshah rem.
Ha kawei pat ka jingïakhun kaba ar ka Nongkseh United ka la pynliem noh ïa ka Mawphlang SC da 1-0 kol bad ïa kane la thep da u Gerrad Dakerlang Sun ha ka minit kaba 38.
Haba phai sha kawei pat ka jingïakhun ha madan MFA, ka Nongpiur ka la pynliem noh ïa ka Pynthorbah SC da 3-0 kol. Ïa kine la thep da u Rishanskhem Langstieh ha ka minit kaba 43, Mepynsngewbha Nongsiej (78) bad u Andrew Tangsong (80+6).
Kane ka lympung kan bteng biang ha ka sngi Thohdieng ha kaba ka Diengpasoh SC kan ïakynduh pyrshah ïa ka Mawnianglah Youth SC ha ka por 1 baje mynsngi, katba ka Umïew S&CO ïa ka Laitkroh SC ha ka por 4 baje nohphai sngi. Kine ki jingïakhun kin long ha SSA Stadium. Ha madan MFA ka jingïakhun kan long ha por 4 baje nohphai sngi hapdeng ka Seila Sap F&CC pyrshah ïa ka Summit Academy.
