Shillong, Jylliew 11
Ki nongïalam jong ki nongkyrshan u khlur ïalehkai phutbol ka Argentina, u Lionel Messi ha Meghalaya ba la tip ka Messi Fan Club Meghalaya ki la leit ïakynduh ïa u Deputy Commissioner ka East Khasi Hills u Abhilash Baranwal ban pan jingbit na u, na ka bynta ban pynlong ïa ka rally ne jingïaid paidbah ha ka nongbah Shillong ban ai burom ïa utei u khlur ïalehkai uba mut ban shong-thait noh hadien ka FIFA World Cup 2026.
Ki nongkyrshan u Messi ki la pyntip ba ha ka sngi Saitjaiñ (13 tarik) kin pynlong ïa ka jingïaid paidbah, na ka liang u DC ruh u la ong ba un sa pyntip ïa u SP halor kane ka bynta. Te kumta ki nongïalam ki la kyntu ruh ïa ki paidbah ba kyrshan jong u Messi ba kin ïa mih paidbah ha katei ka sngi bad ban ïaid da ki thuk thuk khnang ban ym pynthut ïa ka ïaid ka ïeng ki paidbah, lyngba ka jingai jingmut u DC.
